Ukraina Rossiya neftini Vengriyaga yetkazuvchi «Drujba» quvuriga yana zarba berdi

Ukraina dronlari Rossiyaning Bryansk viloyati, Unech shahridagi «Drujba» neft quvurining neft haydash stansiyasiga yana zarba berdi.

UQK uchuvchisiz tizimlar kuchlari qo‘mondoni Robert Brovdi o‘z telegram-kanalida dronlar zarbasi haqida xabar berar ekan, xususan, venger tilida «Ruslar uyga daf bo‘linglar!», deb yozdi.

Vengriya tashqi ishlar vaziri Peter Siyyarto 22 avgust kuni ertalab feysbukda «Do‘stlik» quvuri orqali Rossiyadan neft yetkazib berish yana to‘xtatilganini ma’lum qildi.

«Bu mamlakatimiz energetika xavfsizligiga yana bir hujumdir. Bizni urushga tortishga navbatdagi urinish. Ularning qo‘lidan hech narsa kelmaydi! Biz tinchlikka erishishga qaratilgan sa’y-harakatlarni qo‘llab-quvvatlashda va milliy manfaatlarimizni bor kuchimiz bilan himoya qilishda davom etamiz!», deb yozdi Vengriya tashqi ishlar vaziri.

Rossiya Mudofaa vazirligi 21 avgust kuni kechqurun Bryansk viloyati ustida ikkita dron urib tushirilgani haqida xabar bergan edi.

Ilgari Ukraina dronlari 18 avgust kuni «Drujba» neft quvuriga zarba bergan edi. Shunda neft yetkazib berish to‘xtatildi, ammo 20 avgustga kelib quvur yana ishga tushdi. Bungacha dronlar 13 avgustga o‘tar kechasi Utechdagi neft haydash stansiyasiga hujum qilgandi.

«Drujba» quvuri orqali Rossiya neftini Vengriyadan tashqari Slovakiya ham oladi.