Kiyev 2025 yilda Rossiya Markaziy bankining 10 mlrd yevrolik mablag‘larini oldi

Yevropa Ittifoqi joriy yilning birinchi olti oyida Rossiya Federatsiyasi Markaziy bankining YeI hududida muzlatilgan Rossiya aktivlaridan tushgan mablag‘dan Ukrainaga 10,1 milliard yevro o‘tkazdi. Bu haqda Welt am Sonntag gazetasi Yevropa komissiyasi ma’lumotlariga tayanib xabar berdi. Ushbu xabar gazeta saytida e’lon qilindi.

Ta’kidlanishicha, Bryusseldan olingan mablag‘lar Ukrainada ham fuqarolik, ham harbiy loyihalarni rivojlantirishga yo‘naltiriladi. Xususan, joriy yilning mart, may, iyun va iyul oylarida Ukraina prezidenti Volodimir Zelenskiy hukumati Rossiyaning Yevropa Ittifoqi hududida muzlatilgan aktivlaridan tushgan daromaddan bir milliard yevrodan olgan. Yanvar oyida bu miqdor 3 milliard yevroni, aprelda 3,1 milliard yevroni tashkil qilgan.

2022 yilda, Rossiyaning Ukrainaga to‘liq miqyosli harbiy bostirib kirishi boshlanganidan so‘ng, Yevropa Ittifoqi Rossiyaning umumiy qiymati 210 milliard yevroga teng aktivlarini muzlatib qo‘ydi. Bu mablag‘lar Yevropaning eng yirik markaziy depozitariysi bo‘lgan Euroclear tomonidan boshqariladi.

Rossiya rasmiylari muzlatilgan aktivlardan olinadigan foydadan foydalanilishiga qat’iyan qarshi. Euroclear'ga hozirda muzlatilgan Rossiya aktivlari, shu jumladan tadbirkorlar va boshqa sanksiyalangan shaxslar bilan bog‘liq 100 dan ortiq da’volar berilgan. Euroclear'ga yaqin manbalarga ko‘ra, Rossiya allaqachon Euroclear mijozlarining Moskvadagi Rossiya markaziy depozitariysiga tegishli 33 milliard yevrolik aktivlarini musodara qilgan.