Turkiya fermerlari O‘zbekistondan ishchi kuchini jalb etishga qiziqish bildiryapti

Taqdimotda Nig‘de viloyat chorvadorlar va fermerlar uyushmasi rahbarlari hamda a’zolari qatnashdi.

Uyushma raisi B.Guney tadbir avvalidagi nutqida uyushma 14 000 dan ortiq a’zolarni birlashtirishini, ular asosan Yevropa mamlakatlaridan keltirilgan nasldor chorva mollari, sut va go‘sht mahsulotlari yetishtirishini ta’kidladi.

Qayd etilishicha, mazkur sohada kadrlar va ishchi kuchining yetishmasligi chorvadorlarning oldida turgan asosiy muammolardan biri hisoblanadi. "Bugungi kunda hududda qishloq xo‘jaligi mahsulotlari yetishtirish va chorvachilik sohasidan 200 nafardan ortiq ishchi kuchiga ehtiyoj bor, – dedi uyushma raisi. – Uyushma a’zolari ushbu ehtiyoj o‘rnini to‘ldirish, bu orqali sohani yanada rivojlantirish maqsadida O‘zbekiston bilan hamkorlik qilishga tayyor".

Niğtaş A.Ş. kompaniyasi bosh direktori o‘rinbosari Xamdi Aruk haydovchi, payvandchi, zootexnik, veterinar kabi mutaxassisliklar bo‘yicha ishchi kuchiga ehtiyoj borligini bildirdi. U mazkur mutaxassisliklar bo‘yicha 100 nafardan ortiq O‘zbekiston fuqarolarini ishga jalb etishga tayyorligini tasdiqladi.

"Turkiya mehnat qonunchiligida ish beruvchilar o‘z korxonasida nogironligi bo‘lgan shaxslar bandligini ta’minlash majburiyati belgilangan. Shu bois, O‘zbekistondan o‘z sohasining yetuk mutaxassisi va mehnatga yaroqli bo‘lgan imkoniyati cheklangan shaxslarni ham ishga qabul qilishimiz mumkin. Shuningdek, kompaniyaning chorvachilik fermalaridagi bo‘sh ish o‘rinlarga 20 kishining bandligi ta’minlash imkoniyati bor", – dedi Xamdi Aruk.