Erdo‘g‘an NATOni RF bilan munosabatlarni Turkiya modeli asosida qurishga chaqirdi

Turkiya prezidenti Rajab Toyyib Erdo‘g‘an Yevropa davlatlari Kiyevni qo‘llab-quvvatlasa-da, Rossiyaning Ukrainaga qarshi urushi yaqin kelajakda yakunlanishiga ishonmaydi. «Men bunga haqiqatan ham ishonmayman. Va bu butun dunyo uchun yaxshi emas. Bu yomon yangilik va shunday fikr yuritish biz uchun qiyin», dedi u 23 sentabr, seshanbaga o‘tar kechasi Amerikaning Fox News telekanalida.

Uning tushuntirishicha, Ukraina Rossiya bilan iqtisodiy jihatdan raqobatlasha olmaydi, Yevropa esa Kiyevga cheksiz iqtisodiy yordam bera olmaydi. «Umid qilamizki, bu qo‘llab-quvvatlash davom etadi», — dedi Turkiya yetakchisi va AQShning Ukrainani qancha vaqt qo‘llab-quvvatlashini taxmin qila olmasligini aytdi.

Rossiyaning Yevropa Ittifoqi havo hududidagi provokatsiyalariga NATOning ehtimoliy javobi haqidagi savolga javob berar ekan, Erdo‘g‘an ittifoqni Rossiya prezidenti Vladimir Putin va Ukraina prezidenti Volodimir Zelenskiy bilan yaxshi aloqada bo‘lgan Turkiyaga o‘xshash modelga amal qilishga chaqirdi. Uning fikricha, NATO keskinlikni kamaytirish uchun har ikki tomon bilan diplomatik hamkorlik tamoyillariga amal qilishi kerak.

«Rossiya juda jiddiy yo‘qotishlarga uchradi. Ukraina ham insoniy va moliyaviy jihatdan juda jiddiy yo‘qotishlarga uchradi. Biz bu davom etishini xohlamaymiz», — deya qo‘shimcha qildi Turkiya rahbari.

Rossiyaning Ukrainaga keng ko‘lamli bostirib kirishi boshlanganidan beri Turkiyada Rossiya va Ukraina delegatsiyalari o‘rtasida bir necha marta muzokaralar o‘tkazildi. Turkiya prezidenti, shuningdek, Zelenskiy va Putinning shaxsiy uchrashuvini o‘tkazishga ham chaqirgan.