«Liverpul»da ahmoqona qizil, «Real»da g‘alabali seriya. Kun o‘yinlari

Angliya: «Chelsi»ning kambeki va Isakning debyut goli

«Linkoln» – «Chelsi» 1:2
Gollar: Strit, 42 (1:0). Jorj, 48 (1:1). Buonanotte, 50 (1:2)
«Linkoln»: Jikok, Heymer, Darikva, Touler, Bredli, Monsma (Okoronkko, 85), Varfolomeyev (Beyliss, 71), Makgrendls, Haus (Hekkett-Feyrchayld, 71), Draper (Kollinz, 71), Strit (Obikvu, 71)
«Chelsi»: Yyergensen, Chaloba, Fofana, Xato, Gyusto, Fernandes (Kukurelya, 70), Santos, Buonanotte (Uolsh, 90+5), Garnacho (Estevan, 59), Gittens (Pedru Netu, 70), Jorj (Meuka, 70)
Ogohlantirishlar: Draper, 56. Haus, 63. Kollinz, 83 – Santos, 22. Fernandes, 54. Yyergensen, 90. Kukurelya, 90

«Chelsi» Angliya ligasi kubogining 1/16 finali doirasida uchinchi divizion vakili «Linkoln» mehmoni bo‘ldi va birinchi bo‘limni hisobda ortda qolgan holda yakunladi va ko‘pchilik turnirning o‘tgan bosqichida «MYu» «Grimsbi»ga yutqazib, turnirni tark etganini yodga oldi. Ammo xavotirlar o‘rinsiz bo‘lib chiqdi va ikkinchi bo‘lim boshida londonliklar tezda vaziyatni o‘z tomoniga og‘dirdi. Avvaliga Jorj jarima maydoni chizig‘i oldida o‘ziga kelib qolgan to‘pni bo‘ysundirib, olis burchak tomon qaytarib bo‘lmas zarba yo‘lladi, ikki daqiqa o‘tib esa Buonanotteni golli pas bilan ta’minladi.

«Liverpul» – «Sauthempton» 2:1
Gollar: Isak, 43 (1:0). Charlz, 76 (1:1). Ekitike, 85 (2:1)
«Liverpul»: Mamardashvili, Gomes, Leoni (Kerkez, 81), Roberson, Frimpong, Endo, Jons (Bredli, 57), Noni, Ngumoxa (Danns, 75), Kiyeza, Isak (Ekitike, 46)
«Sauthempton»: Makkarti, Menning, Yyelert (Fellouz, 88), Kuarshi, Vud-Gordon, Edvards (Styuart, 88), Siyenza (Robinson, 62), Dauns, Yander (Charlz, 51), Armstrong, Archer (Dauns, 51)
Ogohlantirishlar: Ekitike, 53 – Archer, 45. Menning, 90+2
Chetlatish: Ekitike, 86 (ikkinchi sariq)

«Liverpul» uchun ham barchasi silliq kechmadi. Arne Slot bu o‘yinga ikkinchi tarkibni tushirgandi, shu tufayli gurjistonlik darvozabon Mamardashvili hamda italiyalik 18 yoshli himoyachi Leoni «Enfild»da debyut qilishga muvaffaq bo‘ldi. Shu bilan birga, Isak ilk bor boshlang‘ich tarkibda tushdi, u «Nyukasl»dagi isyoni tufayli o‘yin amaliyotiga ega bo‘lmagan va hali kerakli formaga kirib olmagan. Undan mavsumni kuchli boshlagan Ekitikedan yaxshiroq ekanini isbotlash talab etiladi.

O‘tgan mavsum yakunida APLdan tushib ketgan va yozda qator yetakchilarini sotib yuborgach, yangi mavsumda chempionshipda 19-o‘rinda borayotgan «Sauthempton» kutilmaganda jiddiy qarshilik ko‘rsatdi. Mehmonlar kamida ikki bor Gomesning xatolari tufayli «Liverpul»ni jazolashi mumkin edi. Mezbonlar esa bo‘lim oxirida vaziyatlarni qadrlash bo‘yicha dars berishdi. Armstrong Mamardashvili ustidan oshirib yo‘llagan to‘p darvoza to‘siniga tegishidan bir daqiqa o‘tib qizillarning pressingi ostida darvozabon to‘p uzatishda xatoga yo‘l qo‘ydi, to‘pni egallab olgan Kiyeza darvoza qarshisida bo‘sh turgan Isakni golli pas bilan ta’minladi. Aleksander uchun bu yangi jamoasidagi ilk gol bo‘ldi, murabbiy esa hali 90 daqiqa o‘ynashga tayyor bo‘lmagan shvetsiyalik hujumchini tanaffusda zaxiraga oldi va uning o‘rniga Ekitikeni tushirdi.

Fransuz hujumchisi esa shu kuni amalda o‘z harakatlari bilan asosiy tarkibdagi o‘rnini yo‘qotdi. Avvaliga u 53-daqiqada sportga xos bo‘lmagan harakatlari bilan sariq kartochka oldi: hakamning qaroriga qo‘shilmasdan, to‘pni tepib yuborgani uchun.

76-daqiqada esa «Sauthempton» hisobni tenglashtirdi va «Liverpul» barchasini boshidan boshlashiga to‘g‘ri keldi.

Mezbonlar yana to‘liq kuch bilan oldinga tashlanishdi va ayrimlar hissiyotlarini jilovlay olmadi. 85-daqiqada Kiyeza ancha orqadan uzun uzatma berdi, to‘pga ofsayddan qutulib qolgan Kiyeza yetib bordi va uni bo‘sh darvoza qarshisidagi Ekitikega yetkazdi, fransuz hujumchisi esa osonlik bilan darvozani ishg‘ol etdi. Ammo futbolchi sariq kartochkasi borligini yoddan chiqarib, golni nishonlash chog‘ida futbolkasini yechib yubordi.

Shu zahoti Jyeremi Frimpong Ekitikening oldiga chopib keldi – uni tabriklash uchun emas, balki nima qilib qo‘yganini tushuntirish uchun.

O‘yin hakami Tom Bremell esa futbolchiga ikkinchi sariq kartochkani ko‘rsatdi va «Liverpul» ozchilik bo‘lib qoldi.

«Liverpul» g‘alabali hisobni saqlab qoldi, lekin Yugo endi kamida APLning navbatdagi turida «Kristal Pelas»ga qarshi o‘ynamaydi — Kubok o‘yinlaridagi diskvalifikatsiya APL uchun ham amal qiladi.

«Liverpul» futbolchilari sherigidan noroziligini ochiq bayon etishmoqda. Endryu Roberson o‘yindan keyin shunday dedi: «Uning to‘pni tepib yuborib olgan birinchi sariq kartochkasi – ahmoqlik edi. U buni esdan chiqarib qo‘ydi. Ikki ogohlantirish – va biz uni shanba kungi o‘yin uchun yo‘qotdik. Umid qilamanki, u bundan saboq chiqaradi va boshqa bunday qilmaydi».

Mersisaydliklar bosh murabbiyi Arne Slot ham hujumchining harakatlariga baho berishda ahmoqlik so‘zini ishlatdi: «Agar oldindan sarig‘i bo‘lmaganida ham bunday harakat ahmoqlik edi. Men eskicha odam bo‘lishim mumkin, ammo men ham bir qancha gollar urganman. Agar sen uch kishidan o‘tib kelib, to‘pni yuqori burchakka joylashtirsang, buni o‘z xizmating deb atashing mumkin bo‘lardi. Agar men uniki kabi [oson] gol urganimda, Kiyezaning oldiga borib, unga minnatdorchilik bildirgan bo‘lardim».

Ekitike o‘yindan keyin ijtimoiy tarmoqlardagi sahifalarida uzr so‘radi: «Bugun Liga kubogidagi ilk o‘yinimda jamoamga o‘z uyida yana bir g‘alabani qo‘lga kiritishda yordam berishdan juda ruhlangan edim... His-tuyg‘ularim ustunlik qildi. Butun qizillar oilasidan uzr so‘rayman, bizni doim qo‘llab-quvvatlab kelayotgan muxlislarga va ushbu g‘alaba uchun jamoadoshlarimga rahmat aytaman!»

Katta ehtimol bilan, u diskvalifikatsiyani o‘taganidan keyin ham boshlang‘ich tarkibga qayta olmaydi – Slot uni kechirishi uchun vaqt talab etiladi.

Ispaniya: Vinisius yana ilhom bilan o‘ynamoqda

«Atletik» – «Jirona» 1:1
Gollar: Unai, 9 (0:1). Xauregisar, 48 (1:1)
«Atletik»: Simon, Paredes, Lyaport, Boyro (Areso, 46), Gorosabel (Berchiche, 46), Vesga (Ruis de Galarreta, 46), Hauregisar, Sanset (Navarro, 81), Serrano (Berenger, 46), Inyaki Uilyams, Guruseta
«Jirona»: Gassaniga, Franses, Blind, Moreno, Rinkon (Kuruma, 86), Solis (Martines, 76), Xil (Asprilya, 76), Martin, van de Bek (Portu, 33), Unai, Vanat (Stuani, 86)
Ogohlantirishlar: Unai, 68. Martin, 90

Bilbaodagi o‘yinda basklar Niko Uilyams terma jamoa bazasidan jarohat bilan qaytishi ortidan boshlangan muvaffaqiyatsiz seriyaga barham berish uchun harakat qildi. U yo‘qligida «Atletik» Chempionlar ligasida va ichki birinchilikda uch o‘yinda gol urmasdan yutqazdi, u borligida esa chempionatni uch g‘alaba bilan ideal tarzda boshlagandi.

Ammo mezbonlar besh turdan keyin atigi bir ochko bilan turnir jadvali oxirida joylashgan «Jirona»ni ham yenga olishmadi. Kataloniyaliklar o‘yin startida mezbonlar uyushtirgan hujumlarni qaytardi va birinchi hujumidayoq Unaining rikoshet orqali darvoza to‘riga borib tushgan zarbasi bilan hisobni ochdi. Mezbonlarning uzoq kutilgan goli esa ikkinchi bo‘lim boshida, Hil o‘z jamoasi jarima maydoni yaqinida to‘p yo‘qotishidan foydalangan Hauregisar uni yuqori burchakka aniq yo‘naltirishi orqali urildi. Shunga qaramay, maydon egalari muvaffaqiyatni rivojlantira olmadi. Ernesto Valverde jamoasida kichik inqiroz davom etmoqda, endi jamoa tur yakunlariga ko‘ra beshinchi o‘rinni ham boy berishi mumkin.

«Sevilya» – «Vilyarreal» 1:2
Gollar: Oluvaseyi, 17 (0:1). Sou, 51 (1:1). Solomon, 86 (1:2)
«Sevilya»: Vlaxodimos, Kastrin (Nyanzu, 54), Salas, Aspilikueta, Gudel (Karmona, 71), Sou, Suaso, X. Sanches (Mendi, 71), Yanuzay (Vargas, 59), Edjuke (A. Sanches, 55), Adams
«Vilyarreal»: Tenas, Marin, Veyga, Kardona (Parti, 84), Mourinio, Geyye, Komesanya (Pedrasa, 29), Parexo (Solomon, 84), Moleyro (Mikautadze, 69), Byukenen, Oluvaseyi (Pepe, 69)
Ogohlantirishlar: Gudel, 70. Oso, 90 – Geyye, 42. Pedrasa, 47. Marin, 85

Raqobatchilarning ochko yo‘qotishidan (to‘rtinchi o‘rindagi «Espanyol» ham «Valensiya» bilan 2:2 hisobida durang o‘ynadi) «Vilyarreal» unumli foydalandi. Shu bilan birga, «sariq sumbarinalar» uchun ham tur oson kechmadi va jamoa «Sevilya» bilan ochkolarni bo‘lishib olishi mumkin edi, ammo Marselino Toral zaxiradan futbolchi tushirishda topqirlik qildi. Mikautadze va Solomon uch kun oldin «Osasuna» bilan o‘yinda burilish yasagandi (2:1), bu safar esa ular «Ramon Sanches Pisxuan»dagi o‘yinda ham bosh rollarda bo‘lishdi. 86-daqiqada gurjistonlik hujumchi chiroyli harakatlari bilan himoyachilarni ortda qoldirdi va qulay vaziyatda ochilgan isroillik hujumchini golli pas bilan ta’minladi.

«Levante» – «Real» 1:4
Gollar: Vinisius Junior, 28 (0:1). Mastantuono, 38 (0:2). Etta Eyong, 54 (1:2). Mbappe, 64 - penalti (1:3). Mbappe, 66 (1:4)
«Levante»: Rayan, de la Fuente, Elhesabal, Pampin, Tolyan, Vensedor (Bruge, 65), Rey, Olasagasti (Arriaga, 65), Alvares (Morales, 74), Romero (Koyyalipu, 74), Etta Eyong (Losada, 74)
«Real»: Kurtua, Karreras (Alaba, 82), Hausen, Garsiya, Raul Asensio, Valverde (Tshuameni, 71), Sebalyos (Kamavinga, 82), Arda Guler, Vinisius Junior, Mastantuono (Bellinghem, 71), Mbappe (Rodrigu, 82)
Ogohlantirishlar: Elhesabal, 58 – Karreras, 54

Vinisius Junior boshlang‘ich tarkibga qaytdi va chiroyli gol urdi. Braziliyalik hujumchining butsasining tashqi qismida yo‘llagan zarbasidan keyin mezbonlar darvozabonida to‘p olis burchakka yo‘l olishini tomosha qilishdan o‘zga chora qolmadi. Vini bu golini o‘z uslubidagi raqs bilan nishonladi, shundan keyin hech qanday muammo yo‘qligiga ishora qilgan holda «Real» emblemasini o‘pib qo‘ydi (so‘nggi vaqtlarda u asosiy tarkibdan tushib qolganidan noroziligi va ketish haqida o‘ylayotgani haqida mish-mishlar tarqalgandi). Shu bilan birga, o‘yinni madridliklar uchun oson boshlandi deb bo‘lmaydi, «Levante» birinchi hujumidayoq gol urishi mumkin edi, ammo 3-daqiqada Romeroning, 13-daqiqada Adrian De La Fuentening qulay pozitsiyadan yo‘llagan zarbalariga biroz aniqlik yetishmadi.

Valensiyaliklar o‘tkazib yuborilgan goldan keyin ham hujumkor o‘yin namoyish etishdi, ammo «Real» futbolchilari, ayniqsa, Vinisius shu kuni maydonga katta ishtiyoq bilan tushgandi. Braziliyalik futbolchi tanaffus arafasida dublni rasmiylashtirishiga sal qoldi (Rayan to‘pni oyoqlari bilan qaytarib qoldi), ammo u baribir ikkinchi golli harakatni amalga oshirdi va Mastantuonoga assistentlik qildi. Argentinalik yosh iste’dod «Qirollik klubi»dagi ilk golini nishonladi. Lekin bu faqat bir darvozaga hujum qilingan o‘yin emasdi va mezbonlar ikkinchi bo‘limda javob golini urdi, jamoa yozda «Vilyarreal»dan sotib olgan yosh hujumchi Etta Eyong mavsum boshidan buyon to‘rtinchi golini urdi, uning hisobida 3 ta golli assist ham bor.

Bu goldan keyin «Real» yana uyg‘ondi va o‘yin masalasini uzil-kesil hal qildi. Javob golidan o‘n daqiqa o‘tib Mbappe penalti ishladi va uni o‘zi aniq ijro etdi. Ikki daqiqa o‘tib fransiyalik hujumchi Arda Gulerning pasidan keyin darvozabon yakkama-yakka vaziyatga chiqib bordi va dublini nishonladi. Mbappe mavsumning yetti o‘yinida urgan gollari sonini to‘qqiztaga yetkazdi, «qaymoqranglilar» ichki chempionatda olti o‘yinda olti g‘alabaga erishdi. Habi Alonso birinchi mavsumni ideal boshladi, «Real»da Vanderley Lushemburg davridan buyon bu qadar muvaffaqiyatli start bo‘lmagan, braziliyalik mutaxassis 2005 yilda mavsumni yetti g‘alaba bilan boshlagandi va bu natijani takrorlash uchun, Alonso shanba kuni Madrid derbisida ham g‘alaba qozonishi talab etiladi.

Italiya: Nkunku chiroyli gol bilan boshladi

«Milan» – «Lechche» 3:0
Gollar: Ximenes, 20 (1:0). Nkunku, 51 (2:0). Pulishich, 64 (3:0)
«Milan»: Menyan, de Vinter, Pavlovich (Odogu, 79), Tomori, Richchi (Fofana, 46), Loftus-Chik, Rabio, Bartesagi, Salemakers (Atekame, 61), Ximenes (Myul-Balentin, 68), Nkunku (Pulishich, 61)
«Lechche»: Fryuhtl, Ndaba, Zibert, Tiagu Gabriel, Tete Morente (Gallo, 57), Veyga, Berisha (Kulibali, 80), Helgason (Gorter, 46), Kaba (Perotti, 46), N`Dri (Kialonda Gaspar, 22), Kamarda
Ogohlantirishlar: Richchi, 35. Pavlovich, 70 – Kaba, 43
Chetlatish: Zibert, 18

Italiya kubogi 1/16 finali doirasidagi o‘yinda «Milan» raqib darvozasiga shiddatli hujumlar uyushtirdi va dastlabki o‘n daqiqadan so‘ng 3:0 hisobida oldinda borishi mumkin edi. Biroq, Loftus-Chikning zarbasini himoyachi chiziq ustida to‘xtatib qoldi, Rabioga gol urishga darvozabonning aqlbovar qilmas seyvi to‘sqinlik qildi, Nkunku esa bir yarim metr masofadan yo‘llagan zarbadan keyin to‘p ustunga tegdi. Lekin «Lechche»ning omad limiti ancha tez tugadi, muammolar esa tobora ortib bordi. 18-daqiqada mehmonlar Zibertning chetlatilishi tufayli ozchilik bo‘lib qolishdi, ikki daqiqa o‘tib esa Santiago Ximenes qanotdan uzatgan to‘pni bo‘sh qolgan darvozaga yo‘llab, hisobni ochdi.

Hammasi Massimiliano Allegrining rejasi bo‘yicha keta boshladi va endi asosiy intriga o‘yin qanday hisobda yakunlanishida qolgandi. Nkunku ikkinchi bo‘lim boshida «San-Siro»dagi ilk golini urib, hisobdagi ustunlikni oshirdi. Uning o‘rniga zaxiradan tushgan Pulishich esa muvaffaqiyatni davom ettirdi. Amerikalik hujumchi dam olish kunlari A Seriya doirasidagi o‘yinda «Udineze» darvozasiga dubl qayd etgan, shuningdek Fofanning goliga hammualliflik qilgandi, endi esa fransuz yarimhimoyachisi unga qarzini qaytardi. Fofana to‘pni qanotdan oshirib berdi, Kristian bir teginishda to‘pni yuqori burchakka yo‘lladi. Rossonerilar endi Italiya kubogining 1/8 finalida «Latsio»ga qarshi o‘ynaydi.