«Liverpul» yana yutqazdi, «MYu»da g‘alaba. Kun o‘yinlari

Angliya: «Sanderlend» ikkinchi o‘rinda

«Chelsi» – «Sanderlend» 1:2
Gollar: Garnacho, 4 (1:0). Izidor, 22 (1:1). Talbi, 90+3 (1:2)
«Chelsi»: Sanches, Chaloba, Achimpong (Adarabioyo, 76), Kukurelya, Jyeyms, Fernandes, Kaysedo, Joao Pedro (Santos, 85), Garnacho (Estevao, 58), Pedru Netu (Jorj, 85), Giu (Gittens, 76)
«Sanderlend»: Rufs, Ballard, Gertreyda, Mandava, Hyum, Mukele, Sadiki, Jaka, Le Fe (Rigg, 75), Traore (Talbi, 65), Izidor (Brobbi, 75)
Ogohlantirishlar: Santos, 88 – Le Fe, 70

Garnacho o‘yin startidayoq yaqin burchakni aniq nishonga olib, «Chelsi» safidagi ilk golini nishonladi. Argentinalik futbolchi – ko‘klar jamoasi safida bu mavsumda gol urgan o‘ninchi futbolchiga aylandi va Enso Mareska jamoasi bilan bu borada faqat APL yetakchisi «Arsenal» bir xil ko‘rsatkichga ega. Ammo londonliklar muvaffaqiyatni rivojlantira olishmadi, bo‘lim o‘rtalarida mehmonlar to‘purari Izidor mavsumdagi to‘rtinchi golini urib, hisobni tenglashtirdi. Butun o‘yin davomida mezbonlar «qora mushuklar» jarima maydonini qamal qildi, ammo o‘z maqsadiga erisha olmadi, o‘yinga qo‘shib berilgan daqiqalarda esa raqib himoyachilarning xatosidan foydalanib, g‘alabani ilib ketdi, bu ularning «Stemford Brij»da 2014 yildan buyon ilk bor g‘alaba qozonishidir. Mavsum debyutantlaridan biri bo‘lgan «Sanderlend» endi ochkolari sonini 17 taga yetkazib, turnir jadvalida hozircha ikkinchi o‘ringa ko‘tarilib oldi, bu mavsum chempionlik uchun kurashishi kutilgan «Chelsi» esa yettinchi o‘rinda joylashgan.

«Nyukasl Yunayted» – «Fulhem» 2:1
Gollar: Merfi, 18 (1:0). Lukich, 56 (1:1). Gimarayns, 90 (2:1)
«Nyukasl Yunayted»: Poup, Botman (Sher, 61), Tshau, Bern, Trippiyer, Gimarayns, Mayli (Tonali, 61), Joelinton, Gordon (Elanga, 76), Myorfi (Barns, 61), Voltemade (Osula, 86)
«Fulhem»: Leno, Bassi, Diop, Sessenon, Tete, Berge, Lukich (Kerni, 85), Smit-Rou (Kevin, 46), Ivobi, Traore (King, 76), Ximenes
Ogohlantirishlar: Tete, 3. Ivobi, 66

Chempionlar ligasida ishlari yaxshi ketayotgan «Nyukasl» ichki chempionatda turnir jadvalining ikkinchi qismidan ko‘tarilish uchun kurash olib bormoqda. Shanba kungi o‘yinda bu maqsad sari muhim qadam tashlandi, apreldan buyon gol urmagan Myorfi esa maydon markaziga yaqin hududda Bassidan to‘pni olib qo‘ydi va o‘z yurishini gol bilan yakunladi. Ammo «Fulhem» ikkinchi bo‘lim boshida muvozanatni tikladi, mezbonlar esa faqat so‘nggi daqiqalarda bir amallab g‘alaba golini urishdi. Bu vaziyatda ham mehmonlar maydon markazida to‘p yo‘qotishdi va hujumni Bruno Gimaraes qaytgan to‘pni darvoza to‘riga yo‘llash bilan yakunladi.

«Manchester Yunayted» – «Brayton» 4:2
Gollar: Kunya, 24 (1:0). Kazemiro, 34 (2:0). Mbeumo, 61 (3:0). Uelbek, 74 (3:1). Kostulas, 90+2 (3:2). Mbeumo, 90+6 (4:2)
«Manchester Yunayted»: Lammens, de Ligt, Shou (Heven, 65), Yoro, Brunu Fernandesh, Kazemiro (Dorgu, 70), Dalot, Diallo (Maynu, 70), Kunya (Ugarte, 81), Mbeumo, Sheshko (Zirkze, 82)
«Brayton»: Verbryuggen, Dank, van Hekke, Ferdi Kadio‘g‘li, Viffer (Tsimas, 87), Baleba (Milner, 59), Ayyari (Gomes, 60), Ryutter (Kostulas, 79), De Kyuyper (Uotson, 59), Minte, Uelbek
Ogohlantirishlar: Dorgu, 72. Sheshko, 81 – Baleba, 41. Ferdi Kadio‘g‘li, 90

Muxlislar har turda Ruben Amorimning qayg‘uli yuzini ko‘rishga o‘rganib qolishgandi, u «Old Trafford»ga kelganidan keyin bir necha yoshga qarib ketgandek ko‘rinardi. Ammo endi portugaliyalik mutaxassis yosharib qolgandek va yuzida tabassum bilan tribunaga kelgan muxlislarni olqishlamoqda. Qatorasiga uch g‘alaba – bu muxlislar uchun haqiqiy bayram, bu safargi g‘alaba Mateus Kunyaning «MYu» safidagi ilk golini urishi bilan boshlandi. Braziliyalik hujumchi olis masofadan yo‘llagan zarbasi bilan APLning bu boradagi eng mohir futbolchisi ekanini eslatdi. Agar o‘tgan mavsum boshidan buyon hisoblansa, uzoq masofadan urilgan gollar soni bo‘yicha (7) u peshqadamlik qilmoqda. Uning goliga assistentlik qilgan Kazemiro esa ko‘p o‘tmay rikoshet orqali hisobdagi farqni ikkitaga oshirdi. Shundan keyin esa Mbeumo katta sahnaga chiqdi. Kamerunlik hujumchi ikkinchi bo‘limda hisobni yirik ko‘rinishga keltirdi, lekin «Brayton» shundan keyin tashabbusni o‘z qo‘liga olib, oradagi farqni minimumgacha qisqartirdi, Mbeumo esa qo‘shimcha daqiqalarda o‘yin taqdirini hal qildi. Bu g‘alabadan keyin mankunianliklar hozircha kuchli to‘rtlikka kirib olgan.

«Brentford» – «Liverpul» 3:2
Gollar: Uattara, 5 (1:0). Shade, 45 (2:0). Kerkez, 45+5 (2:1). Tiago, 60 – penalti (3:1). Saloh, 89 (3:2)
«Brentford»: Kelleher, van der Berg, Kollinz, Ayyer (Henri, 90+6), Kayode, Henderson, Yarmolyuk (Yanelt, 29), Damsgor (Lyuis-Potter, 79), Shade (Yyensen, 79), Uattara (Oneka, 90+6), Tiago
«Liverpul»: Mamardashvili, van Deyk, Konate, Kerkez (Roberson, 61), Bredli (Makallister, 62), Soboslai, Jons (Ngumoxa, 70), Virs (Gomes, 83), Gakpo (Kiyeza, 61), Saloh, Ekitike
Ogohlantirishlar: Shade, 76. Lyuis-Potter, 90. Tiago, 90 – Kerkez, 33. Salax, 57

Shu kunlarda Angliyada Saloh ijtimoiy tarmoqlardagi sahifalarida «Liverpul» futbolchisi ekani haqidagi ma’lumotni olib tashlagani keng muhokama qilinmoqda. Misrlik futbolchi YeChL o‘yinida boshlang‘ich tarkibga kiritilmaganidan keyin shunday yo‘l tutgandi, ammo u shanba kuni «Brentford» bilan o‘yinda yana ilk daqiqalardan harakat qildi, bu uning APLda uzluksiz 50 o‘yinda startda tushishi bo‘ldi, bunaqasi hali mersisaydliklar tarixida hech bir hujumchi bilan kuzatilmagan. Mezbonlar tezkor gol bilan hisobni ochishgach, 17 sentabrdan buyon davom etayotgan golsiz seriyasi qayd etayotgan Salohdan o‘zini ko‘rsatish talab etilardi, unda bunday imkoniyat yuzaga kelganida esa to‘pni darvoza to‘riga yo‘llash o‘rniga sobiq jamoadoshi Kelleherga jarohat yetkazishiga bir baxya qoldi. Uning ortidan Virs ham jarima maydoni markazida turib to‘g‘ri zarba bera olmadi.

Mezbonlar ham vaziyatlar yaratishda nomdor raqibidan qolishmadi, Mamardashvili Damsgorning darvoza to‘sini ostiga borayotgan zarbasini bartaraf etishiga to‘g‘ri keldi, ammo gurjistonlik posbon yakkama-yakka vaziyatga chiqib kelgan Shade qarshisida ojiz qoldi. Birinchi bo‘limga qo‘shib berilgan daqiqalarda Kerkez mersisaydliklar safidagi ilk golini urdi, ammo bu mehmonlarning muqarrar mag‘lubiyatini bekor qila olmadi.

Tanaffusda g‘aroyib almashtirish amalga oshirildi. Yo‘q, Slot bu safar ham o‘yini chiqmagan Salohni almashtirishga jur’at qilmadi. O‘yin hakam Xuper uchun muddatidan oldin yakunlandi. Birinchi bo‘lim oxirida u jarohat olgani ma’lum bo‘ldi, shu tufayli ikkinchi bo‘lim boshlanishi biroz kechikdi, uning o‘rniga tushirilgan Robinson qizib olishi uchun ma’lum vaqt talab etildi.

Yangi hakam esa van Deykning qo‘polligidan keyin mehmonlar darvozasiga penalti qo‘ydi, bu vaziyatda niderlandiyalik himoyachi raqib hujumchisi Uattarani jarima maydoni ichidan qo‘llari bilan turtib chiqardi va keyin oyog‘ini bosib oldi.

Belgilangan penaltini esa mezbonlar to‘purari Tiago aniq ijro etib, mavsumdagi oltinchi golini urdi.

Saloh esa Soboslaining yordami bilan uzoq kutilgan golini urdi, ammo bu amalda hech narsani o‘zgartirmadi.

90+1-daqiqada van Deyk yana bir bor ehtiyotsizlik qilib, jarima maydoni ichida tirsagi bilan Tiagoning bo‘yin qismiga zarba berdi, ammo bu safar Robinson uni ayadi.

Hakam o‘yinga 11 daqiqa qo‘shib berdi, ammo «Brentford» o‘zi haqli bo‘lgan g‘alabali hisobni ushlab qoldi. Jamoalar birgalikda darvozalarga 34 bor zarba berishdi (17:17), darvoza sohasiga to‘g‘ri borgan zarbalar bo‘yicha mezbonlar ustunlikka erishdi (8:5).

APLning o‘zida qatorasiga to‘rtinchi o‘yinda mag‘lub bo‘lgan «Liverpul»da inqiroz davom etadi. Bu Arne Slot shogirdlarining butun o‘tgan mavsum davomida uchralgan mag‘lubiyatlari soniga teng.

Ispaniya: g‘alabali yubiley

«Valensiya» – «Vilyarreal» 0:2
Gollar: Moreno, 45 – penalti (0:1). Komesanya, 57 (0:2)
«Valensiya»: Agirresabala, Kopete, Tarrega, Xose Gayya (Vaskes, 61), Korreya (Santamariya, 83), Gerra (Andre Almeyda I, 61), Pepelu (Raba, 83), Gruneveld, Rioxa, Beltran (Duro, 46), Diyego Lopes
«Vilyarreal»: Luis Junior, Foyt, Veyga, Kardona, Mourinio, Komesanya (Parexo, 79), Geyn (Partey, 68), Moleyro (Byukenen, 88), Pepe, Moreno (Peres, 68), Mikautadze (Axomax, 79)
Ogohlantirishlar: Kopete, 43. Tarrega, 90 – Geyye, 15. Mourinio, 15. Komesanya, 69. Pepe, 83

Jarohat tufayli avgustdan buyon o‘ynay olmayotgan Jyerar Morenoning qaytishi yubiley o‘yinga to‘g‘ri keldi — ushbu tajribali forvard «Vilyarreal» safidagi 300-o‘yinda maydonga tushdi. U birinchi bo‘lim oxirida penaltidan aniq zarba yo‘llab, o‘z qaytishini gol bilan nishonladi. Jyerar la ligada qatorasiga o‘n ikkinchi mavsumda gol urib, Grizmann, Inyaki Uilyams va Aspas kabi futbolchilarning natijasini takrorladi. Ikkinchi bo‘limda esa Santi Komesanya hisobni ishonchli ko‘rinishga keltirdi. Marselino Toral shogirdlari endi turnir jadvalining uchinchi o‘rnida mustahkam joylashgan. Oldinda faqat bugun bo‘lib o‘tadigan klasiko ishtirokchilari joylashgan. Qolaversa, «Valensiya» endi «sariq sumbarinalar» uchun ichki chempionatdagi eng qulay raqibga aylandi (+22=11-18).

Italiya: Konte yana uddaladi

«Napoli» – «Inter» 3:1
Gollar: De Bryuyne, 33 – penalti (1:0). Maktominay, 54 (2:0). Hoqon Chalxono‘g‘li, 59 – penalti (2:1). Zambo Angissa, 66 (3:1)
«Napoli»: Milinkovich-Savich, Buondjorno (Guterres, 90), Juan Jyezus, Spinatssola (Bekema, 90), Di Lorenso, Gilmor, De Bryuyne (Olivera, 37), Zambo Angissa, Maktominay, Politano (Elmas, 82), Neres (Lang, 81)
«Inter»: Zommer, Acherbi, Bastoni, Akanji, Hoqon Chalxono‘g‘li (Suchich, 73), Mxitaryan (Zelinski, 32), Barella (Frattezi, 73), Dimarko, Dyumfris (Luis Enrike, 73), Martines, Bonni (Espozito, 62)
Ogohlantirishlar: Di Lorenso, 43. Gilmor, 45 – Bastoni, 77

Chempionlar ligasida PSVdan uchralgan sharmandali mag‘lubiyatdan (2:6) keyin «Napoli» o‘z muxlislari qarshisida aybini yuvdi va «Milan»ning «Piza» bilan o‘yinda ochko yo‘qotishidan (2:2) foydalangan holda birinchi o‘ringa qaytdi. Ammo Antonio Konte shogirdlariga oson kechmadi. Birinchi bo‘limda Vanya Milinkovich-Savich Lautaro Martinesning xavfli zarbasini qaytarishiga to‘g‘ri keldi, neradzurrilar himoyachilari Bastoni va Dyumfris esa navbati bilan darvoza ustunlarini nishonga olishdi. Barchasini Mxitaryan o‘z jamoasi jarima maydonida ishlatgan fol o‘zgartirib yubordi, bu vaziyatda armanistonlik yarimhimoyachi jarohat olib maydonni tark etdi, De Bryuyne esa penaltini aniq ijro etib, hisobn ochdi. Qiziq tomoni, belgiyalik yarimhimoyachining o‘zi ham zarba berish vaqtida jarohat oldi va o‘yinni davom ettira olmadi.

O‘yinning ikkinchi bo‘limi neapolitanliklar ssenariysi ostida kechdi. Spinatssola 54-daqiqada raqib himoyachilari ortida qolib ketgan katta zonaga to‘p yetkazib berdi, markaziy hujumchi pozitsiyasida paydo bo‘lgan Maktominayda to‘pni o‘ziga bo‘ysundirish va olis burchak tomon aniq zarba berish uchun yetarlicha ko‘p vaqt bo‘ldi. Bir necha daqiqa o‘tib Hoqon Chalxono‘g‘li ham penaltidan gol urib hisobni tenglashtirdi, ammo ko‘p o‘tmay Zambo-Angissa o‘yin taqdirini hal qilgan golni urdi. «Inter»ning barcha turnirlar doirasida yetti g‘alabadan iborat seriyasiga barham berildi, Konte esa Italiya chempionatining o‘zida uchinchi jamoa bilan ochko to‘plash bo‘yicha 100 talik dovonni zabt etdi. Neapolda ushbu murabbiy 46 o‘yinda bu natijaga erishdi, bu «Inter»dagidan (47) tezroq, ammo «Yuventus»da (44) bundan tezroq bo‘lgandi.

Germaniya: Myunxenning yangi qahramoni va Dortmundning xarakteri

«Borussiya» M – «Bavariya» 0:3
Gollar: Kimmix, 64 (0:1). Rafael Gerreyru, 69 (0:2). Karl, 81 (0:3)
Aniq ijro etilmagan penalti: Shteger, 75’
«Borussiya» M: Nikolas, Diks, Elvedi, Nets (Ulrix, 76), Kastrop, Engelhardt, Zander, Shteger (Reyna, 84), Rayts (Fraulo, 84), Onora (Skalli, 75), Tabakovich (Matino, 63)
«Bavariya»: Urbig, Upamekano (Rafael Gerreyru, 46), Kim Min Je, Bishof (Stanishich, 82), Boe (Laymer, 46), Kimmix, Goretska, Keyn, Dias (Karl, 76), Olise, Jyekson (Gnabri, 59)
Ogohlantirishlar: Upamekano, 28. Dias, 38. Bishof, 74
Chetlatish: Kastrop, 19

Menxengladbaxdagi o‘yin yo‘llardagi tirbandliklar tufayli kechikish bilan boshlandi va bu «Bavariya»ni ritmdan chiqarib yubordi. Dastlabki hujumda yuzaga kelgan imkoniyatdan foydalana olmagan (Dias aniq zarba bera olmadi) myunxenliklar anchagacha mezbonlar himoyasini yorib o‘ta olmadi, holbuki raqib safida 19-daqiqadayoq Kastrop qizil kartochka olgan va mehmonlar bir kishi ko‘p bo‘lib o‘ynay boshlagandi. Shu kuni Keyn mavsum boshidan buyon ilk bor maydonni golli harakatsiz tark etishga majbur bo‘ldi. Shunga qaramay, amaldagi chempionlar Bundesliganing so‘nggi o‘rindagi jamoasini taslim qilishga erishdi, 64-daqiqada jarima maydoni markazida Gnabrining uzatmasini qabul qilib olgan Kimmix zarba berdi, uning dastlabki zarbasini himoyachi to‘sgandi, ammo ikkinchi urinish muvaffaqiyatli chiqdi. Bir necha daqiqa o‘tib zaxiradan o‘yinga qo‘shilgan Rafael Gerreyra hisobdagi ustunlikni mustahkamladi, mezbonlarga esa VAR aralashuvidan keyin belgilangan penalti ham yordam bermadi – Shteger darvozabonni alday olgan bo‘lsa-da, to‘p darvoza ustuniga bordi. Hafta o‘rtasida EChLda muxlislarni o‘ziga maftun etgan 17 yoshli Karl bu safar ham o‘zini ko‘rsatdi, uning uzoq masofadan bergan ajoyib zarbasi amalda o‘yin taqdirini hal qildi. «Bavariya» bu natijadan keyin «Milan»ning 1992 yilgi rekordini yangilab, top-5 ligalar tarixida mavsumni 13 g‘alaba bilan boshlagan ilk jamoaga aylandi.

«Borussiya» D – «Kyoln» 1:0
Gol: Bayyer, 90+6 (1:0)
«Borussiya» D: Kobel, Shlotterbek, Bensebaini, Anton, Nmecha (Bellinghem, 85), Gros (Zabitser, 68), Svensson (Brandt, 85), Ryuerson, Chukvuemeka (Bayyer, 68), Adeyyemi (Silva, 79), Girassi
«Kyoln»: Shvebe, Martel, Jyenk O‘zkajar (Xayns, 56), Xyubers, Xuseynbashich (Shmid, 72), Yoxannesson (Axe, 72), Lunn, Sebulonsen, El Mala (Mayna, 72), Kaminski, Byulter (Kraus, 46)
Ogohlantirishlar: Girassi, 63. Bayyer, 90 – Yoxannesson, 44. Sebulonsen, 45

Shanba kunining eng dramatik bahsi Dortmundda bo‘lib o‘tdi, bu yerda «Borussiya» «Kyoln»ni o‘yinga qo‘shib berilgan oltinchi daqiqadagina taslim eta oldi. Holbuki bungacha «asalarilar»da gol urish uchun yetarlicha vaziyatlar bo‘lgandi, ammo mehmonlar darvozasidagi Shvebe sehrgar rejimini yoqib olgandi. Ammo hal qiluvchi daqiqada Bayyerning zarbasidan keyin to‘p rikoshet orqali darvoza to‘riga borib tushdi. Endi Niko Kovach shogirdlari kamida «Bayyer» va «Shtutgart»ning yakshanba kuni bo‘lib o‘tadigan o‘zaro o‘yini yakuniga qadar uchinchi o‘rinda qoladi.