Polsha bosh vaziri Tusk Ukrainadagi “abadiy urush” haqida ogohlantirdi

Bu fikrlarni Polsha bosh vaziri Donald Tusk shanba, 25 oktyabr kuni The Sunday Times nashri chop etgan intervyusida bildirdi.

Tuskning aytishicha, Kiyevda urush yanada cho‘zilsa, aholi va Ukraina iqtisodi uchun uning narxi qay darajada og‘ir bo‘lishi mumkinligi borasida xavotir bor.

“Men Ukraina mustaqil davlat sifatida yashab qolishiga shubha qilmayman. Hozirgi asosiy savol — qurbonlar soni qancha bo‘ladi. Prezident (Ukraina rahbari Volodimir. — tahr.) Zelenskiy (23 oktyabr. — tahr.) menga urush o‘n yilga cho‘zilib ketmasligiga umid qilishini, ammo Ukrainaning yana ikki-uch yil kurashishga tayyorligini aytdi”, — dedi Polsha hukumati rahbari.

Urush Rossiya iqtisodiyotiga ham zarar yetkazayotganini bildirgan Tuskning ta’kidlashicha, Moskva uzoq muddatli istiqbolda “omon qolish imkoniga ega emas”, vaziyat AQShning yangi neft sanksiyalari bilan yanada og‘irlashgan.

Shu bilan birga, Tusk ichki muammolar Putinni yanada tajovuzkor qilishini aytdi va Oq uy rahbari Donald Trampning Moskvaga nisbatan yangi yondashuvi qay darajada “barqaror” bo‘lishiga shubha bildirdi.

“Ruslar (iqtisodiy jihatdan. — tahr.) juda og‘ir ahvolda. Bu biz g‘alaba qozonayotganimizni anglatadimi? Yo‘q, aslo. Ular G‘arbga, ayniqsa Yevropaga nisbatan bitta katta ustunlikka ega: kurashishga tayyor... urush vaqtida bu hal qiluvchi masala. Agar kurashishga tayyor bo‘lmasangiz yoki, kamida, biror narsadan voz kechmasangiz, g‘alabaga umid yo‘q”, — deya urg‘uladi bosh vazir.

Tusk Buyuk Britaniyani ham NATO va RF o‘rtasida urush chiqsa, “chetda qolish” haqidagi “shirin xayol” bilan yashamaslikka chaqirdi. Uning so‘zlariga ko‘ra, may oyida Kiyevga qo‘shma tashrif davomida Britaniya bosh vaziri Kir Starmer unga Londondagi Kentish-Taunda sobiq uyiga qator yong‘in qo‘yish holatlari qayd etilganini, ularni, ehtimol, rus razvedkasi tashkil etganini aytgan. Tusk Britaniya jamoatchiligining bu voqeaga befarq munosabatidan hayratda qolganini qo‘shimcha qildi.

“Muammo shundaki, Britaniyada bu hech kimni hayratga solmadi. Ochig‘ini aytsam, men shokka tushdim. Bu haqda britan matbuoti yozgandan keyin ham reaksiya xuddi ‘Arsenal’ bilan ‘Liverpul’ o‘rtasidagi futbol o‘yini haqida gap ketayotgandek bo‘ldi. Agar ruslar bunday ishni rejalashtirishga va amalga oshirishga tayyor va qodir bo‘lsa, demak, ular hammasiga tayyor va qodir”, — deb hisoblaydi u.

Polsha bosh vaziri ta’kidlashicha, agar Moskva Belarus yoki Kaliningradda “Oreshnik” gipertovushli ballistik raketalarini joylashtirsa, Londonni ham qo‘shib, istalgan Yevropa poytaxtiga yadroviy zarba berish imkoniga ega bo‘ladi.

“Xavf, birinchi navbatda texnologik jihatdan, global va universal tusga ega”, — dedi u. Unga ko‘ra, Polsha temiryo‘llari va shifoxonalarini ta’minlaydigan infratuzilma allaqachon kiberhujumlarga uchrayapti. “Shu bois uzoqdasiz, bu sizning urushingiz emas, faqat Ukrainaniki yoki Polshaniki, deb o‘ylash kabi shirin xayolda yashab bo‘lmaydi”, — deya qayd etdi nashr suhbatdoshi.

Bundan oldin, 22 sentabr kuni, Tusk Polsha o‘z havo hududi buzilgan hollarda qat’iy chora ko‘rishini aytgan edi.

“Havo hududimizga kirib kelgan va Polsha ustida uchadigan ob’ektlarni urib tushirish haqida qaror qabul qilamiz — bu borada hech qanday shubha yo‘q”, — dedi u matbuot anjumanida.

“Biroq yaqinda Petrobaltic platformasi ustida Rossiya samolyotlari parvozi kabi — aniq buzilish bo‘lmagan hollarda (chunki bu bizning hududiy suvlar emas) — mojaroni keskin bosqichga olib borishi mumkin bo‘lgan harakatlar to‘g‘risida qaror qabul qilishdan oldin rostdan ham yaxshilab o‘ylash kerak”, — deya Reuters uning so‘zlarini keltiradi.

Shu bilan birga, Tusk ittifoqchilar bunday harakatlarga “aynan biz singari” munosabatda bo‘lishiga yuz foiz ishonch hosil qilish lozimligini ta’kidladi.