Putin yil bo‘yi armiyaga chaqiruv haqidagi qonunni imzoladi

Rossiya prezidenti Vladimir Putin 4 noyabr kuni fuqarolarni bir yilning butun kalendar davri — 1 yanvardan 31 dekabrgacha — harbiy xizmatga chaqirishga ruxsat beradigan qonunni imzoladi. 2026 yil 1 yanvardan boshlab harbiy bo‘lim (voyenkomat)lar har kuni chaqiruv yozuvlarini yuborishi, chaqiriluvchilarni tibbiy ko‘rikdan o‘tkazishi va chaqiruv komissiyasi majlislarini o‘tkazishi mumkin bo‘ladi.

Bundan tashqari, davlat reyestriga elektron chaqiruv yuklangan kundan e’tiboran harbiy bo‘limga kelish sanasi 30 kundan oshmasligi kerak. Hozircha elektron chaqiruvlarning amal qilish muddati cheklanmagan. Xizmat o‘tash joyiga jo‘natish esa avvalgidek yiliga ikki mavsumda amalga oshiriladi: 1 apreldan 15 iyulgacha va 1 oktyabrdan 31 dekabrgacha.

Putin shu kuni imzolagan ikkinchi qonun zaxiradagilarni tinch vaqtda ham safarbar qilishga imkon beradi. U Rossiya fuqarolariga — «ixtiyoriy ravishda zaxirada bo‘lish to‘g‘risida shartnoma tuzgan» shaxslarga taalluqli. Hujjatga muvofiq, RF Mudofaa vazirligi zaxiradagilarni «muhim ahamiyatga ega obektlar va boshqa hayotiy infratuzilmalarni himoya qilishni ta’minlash» uchun qo‘shimcha («maxsus») yig‘inlarga yo‘naltirishi mumkin.

RF Davlat dumasi 28 oktyabr kuni armiyaga yil bo‘yi chaqiruv to‘g‘risidagi qonun loyihasini uchinchi, yakuniy o‘qishda ma’qullagan. Shundan so‘ng Yaroslavl va Tyumen viloyatlarida RF Mudofaa vazirligi zaxirasiga qabul e’lon qilindi.

Elektron chaqiruv davlat reyestrida joylashtirilganidan keyin chaqiriluvchi 30 kun ichida harbiy bo‘limga kelishi shartligi haqidagi tuzatish loyihaga ikkinchi o‘qishga tayyorgarlik paytida kiritilgan. Qonunga izoh xatida qayd etilishicha, u chaqiruv punktlari yukini «teng taqsimlash» va fuqarolarni harbiy xizmatga chaqirish sifatini «oshirish»ga qaratilgan.

Ukrainadagi urush boshlanganidan keyin Rossiyada armiyaga chaqiruv qoidalari bosqichma-bosqich qat’iylashtirilmoqda: xususan, yagona harbiy xizmatga majbur shaxslar reyestri yaratildi va elektron chaqiruvlar joriy etildi.