RFning ikki mintaqasida energetika infratuzilmasiga hujum qilindi

Oryol viloyati 5 noyabr kuni tongida ukrain uchuvchisiz apparatlari hujumiga uchradi, deb xabar berdi mazkur Rossiya mintaqasi gubernatori Andrey Klichkov.

Uning aytishicha, dronlar parchalari tushishi natijasida “bir nechta xususiy uylar va xo‘jalik inshooti” zarar ko‘rdi. Jabrlanuvchilar haqida ma’lumot yo‘q, deb qo‘shimcha qildi Klichkov.

Astra Telegram-kanali mahalliy aholi tomonidan olingan foto va videolarni e’lon qildi. Videoda taxminiy portlashning kuchli tovushi eshitiladi. Jurnalistlar qayd etishicha, video tasvirga olingan joy Oryol IEMdan bir yarim kilometrcha uzoqlikda joylashgan.

31 oktyabr kuni Oryoldagi issiqlik elektr markazi hujumga uchragan, o‘shanda uskunalar shikastlangan va elektr ta’minoti uzilgani haqida hokimiyat xabar qilgan edi.

Xuddi shu kechasi Vladimir viloyati ham dronlar hujumiga uchradi, deb ma’lum qildi hudud gubernatori Aleksandr Avdeyev. «Vladimir shahri atrofida energetika infratuzilmasi dronlar hujumiga uchradi», — deb yozdi u. Uning so‘zlariga ko‘ra, hodisa joyida mutaxassislar ishlamoqda, oqibatlarni bartaraf etish ishlari tong otishi bilan boshlanadi.

Ukrainaning Exilenova+ monitoring loyihasi ma’lumotiga ko‘ra, bu yerda elektr podstansiyasi hujumga uchragan.