Kiyev AQSh bilan Tomahawk raketalari bo‘yicha “ijobiy” muzokaralar olib bormoqda

AQSh prezidenti Donald Tramp bunday raketalarni Kiyevga yuborish niyati yo‘qligini bildirganiga qaramay, Ukraina Tomahawk va boshqa uzoq masofali qurollarni xarid qilish bo‘yicha “ijobiy” muzokaralar olib bormoqda. Bu haqda 6 noyabr kuni Ukraina elchisi Olga Stefanishina Bloomberg TV’ga bergan intervyusida ma’lum qildi.

“Muzokaralar hamon davom etyapti, bizda AQShdan ko‘proq harbiy texnika sotib olish uchun mavjud moliyaviy resurslarni ko‘paytirishga intiluvchi bir qator delegatsiyalar ishlayapti”, — dedi Stefanishina Balance of Power dasturi efirida.

Uning qayd etishicha, gap faqat Tomahawk haqida emas, balki “turli darajadagi — ham uzoq, ham qisqa masofali boshqa turdagi raketalar haqida ham bormoqda”. “Ayta oladiganim shuki, muzokaralar juda ijobiy o‘tyapti”, — deya qo‘shimcha qildi u.

Avval Yevropa va yevroatlantik integratsiya masalalari bilan shug‘ullangan Stefanishina Vashingtonga elchi etib ikki oydan biroz avval tayinlangan. Uning asosiy vazifalaridan biri — AQSh prezidenti Donald Tramp bilan munosabatlardagi taranglikni yumshatish bo‘ldi. Tramp Ukraina prezidenti Volodimir Zelenskiyni bir necha bor tanqid qilgan va bir paytlar uni “diktator” deb atagan.

Zelenskiy 2025 yil boshida Oval ofisdagi omadsiz uchrashuvdan so‘ng munosabatlarni yaxshilay oldi — o‘shanda Tramp va vitse-prezident Jyey Di Vens uni keskin tanqid qilgan edi. Oktyabrda esa AQSh prezidenti Moskvaga nisbatan norozilik ortib borayotganini ko‘rsatib, “Rosneft” va “Lukoyl”ga sanksiyalar joriy qildi va Rosciyani “tinchlik jarayoniga jiddiy qiziqish bildirmayotganlik”da aybladi.

Bloomberg ta’kidlashicha, Kiyevning yangi ustuvor yo‘nalishi — Tomahawk va boshqa uzoq masofali tizimlarni qo‘lga kiritish bo‘lib, ular Rossiya hududidagi nishonlarga zarba yo‘llash imkonini berishi mumkin. Biroq Tramp Tomahawk faqat AQSh harbiylari qo‘llaganda samarali bo‘lishini, Vashington esa ularni jalb qilmoqchi emasligini aytgan.

Rossiyaning Ukraina energetika infratuzilmasiga qaratilgan hujumlari davom etayotgani haqidagi savolga javob berib, Stefanishina buni “Ukraina uchun juda og‘ir davr” deb atadi.

“Biz Ukraina havo mudofaa tizimlarini kuchaytirish ustida qat’iy ishlayapmiz, — dedi u. — Bu qishni ham, keyingi qishni ham boshdan kechirishga qodirmiz, ammo bu shunday davom etishi kerak degani emas”. Uning aytishicha, Rossiyaga nisbatan har qanday harakatsizlik “uning imkoniyatlarini yanada kengaytirish uchun ‘yashil chiroq’ sifatida qabul qilinadi”.