O‘zbekistonda «Online-shifokor» xizmati yo‘lga qo‘yiladi

Prezident Shavkat Mirziyoyev 10 noyabr kuni Toshkent davlat tibbiyot universitetiga tashrifi chog‘ida sog‘liqni saqlashni raqamlashtirish doirasida aholiga masofadan tibbiy maslahat beruvchi «Online-shifokor» servisini joriy etish vazifasini belgiladi. Yagona raqamli infratuzilma orqali bemorlar uyidan chiqmasdan vrach bilan bog‘lanib, elektron hujjatlarni olishi mumkin bo‘ladi.

Foto: Prezident matbuot xizmati

Toshkent davlat tibbiyot universitetida bo‘lib o‘tgan taqdimotda sog‘liqni saqlash tizimini raqamlashtirish, tibbiy xizmatlar sifatini oshirish va tibbiy ta’limni takomillashtirish borasidagi ishlar muhokama qilindi. Shu doirada «Online-shifokor» xizmati ishga tushirilishi ma’lum qilindi.

Yangi servisning maqsadi aholiga birlamchi masofaviy qabulni qulay formatda taqdim etish, navbat va safarbarlikni qisqartirish, tezkor yo‘llanmalar berishdir. Quyidagi imkoniyatlar nazarda tutilgan:

videoqabul/audio/chat orqali vrach bilan bog‘lanish;
elektron yo‘llanma va tahlillar bo‘yicha so‘rovlarni masofaviy berib, natijalarni raqamli olish;
«Elektron retsept» tizimi bilan integratsiya asosida dori belgilari va qayta nazoratni yuritish;
holati og‘ir yoki oflayn ko‘rik talab etuvchi bemorlarni tuman/viloyat shifoxonalariga tezkor yo‘naltirish.

Prezidentga taqdim etilgan ma’lumotlarga ko‘ra, mamlakat bo‘ylab yaratilgan yagona raqamli infratuzilmada DMED elektron axborot tizimi orqali 36 milliondan ortiq fuqaroning tibbiy ma’lumotlari jamlangan. Tez tibbiy yordam xizmatida elektron boshqaruv joriy qilinib, chaqiriqqa yetib borish vaqti 25–30 daqiqadan 10–15 daqiqagacha qisqartirilgan. «Elektron retsept» esa ortiqcha dori yozish holatlarini 40 foizga kamaytirgan.

Davlat rahbari «zamonaviy uskunalar va sun’iy intellekt yechimlari eng quyi bo‘g‘ingacha yetsin, har bir tibbiyot xodimi malakasini oshirsin» deya ta’kidlab, raqamli xizmatlarni amaliy natijaga aylantirish yuzasidan mutasaddilarga aniq vazifalar qo‘ydi.