Rossiya kompaniyalari O‘zbekistondan ishchi kuchiga qiziqish bildirmoqda

O‘zbekistonning Yekaterinburg shahridagi Bosh konsulxonasi hamda ushbu shahardagi Migratsiya agentligi vakolatxonasi tashabbusi bilan mahalliy kompaniya vakillari bilan uchrashuvlar tashkil etildi, deb xabar qilmoqda “Dunyo” AA muxbiri.

Dastlab, Rossiya Federatsiyasi hududida neft-gaz, elektr energiyasi, sanoat va qurilish yo‘nalishlarida 90 dan ortiq loyihalarni amalga oshirayotgan “Yevrakor” AJ vakili Olga Sevets bilan suhbat bo‘lib o‘tdi. Uchrashuvda o‘zbekistonlik fuqarolarni kompaniyada tashkillashtirilgan tartibda ishga joylashtirish masalalari muhokama qilindi.

Muloqot davomida “Yevrakor” AJdagi ish jarayonlari, yaratilgan mehnat va yashash sharoitlari, oylik maoshlar, xorijiy fuqarolar uchun turar joy bilan ta’minlash tartibi, shuningdek, vaqtinchalik mehnat faoliyatini amalga oshirish uchun zarur hujjatlar to‘plami haqida ma’lumot berildi.

Olga Sevets ta’kidlashicha, ish beruvchi bilan shartnoma imzolangan taqdirda ishchilar bepul turar joy va oziq-ovqat, shuningdek, kafolatlangan oylik maosh bilan ta’minlanadi. Shu bilan birga, ishchi kuchini tanlash va jalb qilish, patent rasmiylashtirish, xodimlarni ish joyiga yetkazib berish kabi masalalar bo‘yicha ham aniq takliflar bildirildi.

Shuningdek, Tyumen shahrida salat va rukkola qayta ishlashga ixtisoslashgan “Provans” MChJ direktori Tatyana Ovsyankina bilan ham uchrashuv o‘tkazildi. Tomonlar fuqarolarni ushbu korxonada ishga joylashtirish, shuningdek, O‘zbekistonda yetishtirilayotgan qishloq xo‘jaligi mahsulotlari eksportini oshirish imkoniyatlarini ko‘rib chiqdi.

Uchrashuvda qayd etilishicha, kompaniya hozirda O‘zbekistonda yetishtirilayotgan rukkola va aysberg salatini import qilmoqda. Mahalliy bozorda ushbu mahsulotlarga talab yuqori ekani sababli, “Provans” MChJ oyiga 200 tonna aysberg va 40 tonna rukkola xarid qilishni rejalashtirmoqda. Shundan kelib chiqib, kompaniya rahbari o‘zbek fermerlari va eksportchi korxonalar bilan to‘g‘ridan to‘g‘ri hamkorlik o‘rnatishda amaliy yordam so‘radi.

Muloqot chog‘ida O‘zbekiston tomoni xorijga ishchi kuchini yuborish bo‘yicha respublikaning har bir hududida zamonaviy mono-markazlar faoliyat yuritayotganini ma’lum qildi. Ushbu markazlar orqali ish beruvchilar bilan to‘g‘ridan to‘g‘ri ishlash, kadrlar tanlovi va o‘qitish jarayonlarini samarali tashkil etish mumkinligi ta’kidlandi.

Uchrashuvlar yakunida tomonlar bo‘sh ish o‘rinlari, mehnat va yashash sharoitlari, hujjatlarni rasmiylashtirishdagi mavjud muammolarni bartaraf etish, shuningdek, O‘zbekistondan qishloq xo‘jaligi mahsulotlari eksportini kengaytirish yuzasidan ikki tomonlama amaliy tadbirlarni kelishib oldi.