Zelenskiy: urushni yakunlash shartlari bo‘yicha oddiy yechimlar yo‘q

Rossiyaning Ukrainaga qarshi urushiga chek qo‘yish shartlari bo‘yicha oddiy yechimlar bo‘lmaydi, va Kiyev buni tushunadi, dedi Ukraina prezidenti Volodimir Zelenskiy. Biroq qarorlarni qabul qilishda adolat va ochiqlik muhim, shuningdek bu jarayonga Ukrainaning o‘zi jalb etilgan bo‘lishi kerak, deya yozdi u seshanba kuni, 2 dekabr kuni Telegram’da. U buni Moskvada Rossiya prezidenti Vladimir Putin va Trampning maxsus vakili Stiven Uitkoff o‘rtasidagi uchrashuv vaqtida yozdi.

Zelenskiy tinch yo‘l bilan urushni tartibga solish doirasida hal qilinishi lozim bo‘lgan uchta eng qiyin masalani sanab o‘tdi. Uning fikricha, bular — Rossiya tomonidan bosib olingan Ukraina hududlari muammosi, muzlatib qo‘yilgan Rossiya aktivlari masalasi va Ukraina uchun xavfsizlik kafolatlari.

«Biz Qo‘shma Shtatlar va Yevropa tomonidan, shuningdek yana bir qator boshqa yetakchilar tomonidan kuchli xavfsizlik kafolatlariga umid qilamiz. Bu “Ko‘ngillilar koalitsiyasi”ning mavzularidan biri. Biz buning ustida ishlayapmiz», — deb ta’kidladi Ukraina prezidenti.

Zelenskiy, shuningdek, o‘z mamlakatidagi qon to‘kilishni tez orada to‘xtatish zarurligi haqidagi AQSh pozitsiyasini to‘liq qo‘llab-quvvatlashini bildirdi. «Ammo biz bu urushni shunday tarzda yakunlashimiz kerakki, oradan bir yil o‘tgach, Rossiya uchinchi hujum bilan yana qaytib kelmasin. Ular mamlakatimizni okkupatsiya qilish maqsadiga erisha olmadi. Lekin men ularning maqsadlari o‘zgarganiga ishonchim komil emas. Ular faqat kechiktirilishi mumkin, biz esa shundan himoyaga muhtojmiz», — dedi u.

Uning so‘zlariga ko‘ra, Kiyev AQSh delegatsiyasining Rossiyadagi uchrashuvlaridan keyingi signallarni kutyapti. «AQSh delegatsiyasi uchrashuvlardan keyin darhol aynan bizga hisobot berishni xohlayapti. Keyingi qadamlar ana shu signallarga bog‘liq», — dedi Zelenskiy va yaqin orada amerikaliklar tomoni vakillari, jumladan AQSh prezidenti Donald Tramp bilan uchrashuv bo‘lib o‘tishi mumkinligini ham istisno etmadi.

Xuddi shu kuni Moskvada Putin va Uitkoff uchrashuvi bo‘lib o‘tdi, unda, shuningdek, AQSh prezidenti Donald Trampning kuyovi Jared Kushner ham ishtirok etdi. Muzokaralarning mavzusi — Rossiyaning Ukrainaga qarshi urushiga chek qo‘yish shartlari, jumladan bu masala bo‘yicha AQSh tomonidan keltirilgan takliflar muhokama qilindi.

Rossiya prezidenti matbuot kotibi Dmitriy Peskov ta’kidlashicha, Putin bilan Vashington vakillari o‘rtasidagi uchrashuvga aniq vaqt chegaralari qo‘yilmadi va u «qancha kerak bo‘lsa, shuncha davom etdi».

O‘tgan dam olish kunlari Uitkoff, 2025 yil davomida Putin bilan bir necha bor uchrashgan holda, Floridada Amerika delegatsiyasining Ukraina vakillari bilan bo‘lib o‘tgan uchrashuvida ham ishtirok etdi. Tomonlar AQShning tinchlik rejasiga oid turli jihatlarni muhokama qildi. Ishtirokchilar muzokaralarni konstruktiv deb baholadi va olg‘a siljish borligini qayd etdi, ammo uchrashuv yakunida aniq kelishuvlarga erishilgani haqida xabar berilmadi.