FT: Fransiya YeIga Rossiyaning muzlatilgan aktivlarini berishdan bosh tortmoqda

Parij Ukrainaga «reparatsion kredit» berish uchun Fransiyadagi xususiy banklarda muzlatilgan Rossiya aktivlarining ushbu qismidan foydalanishga qarshi chiqmoqda. Bu haqda FT (Financial Times) gazetasi dushanba, 8 dekabr kuni manbalariga tayanib xabar berdi.

Nashr suhbatdoshlari ma’lumotiga ko‘ra, Yevropa bo‘ylab muzlatilgan Rossiya Bankining 200 milliard yevroga yaqin aktivlarining 185 milliard yevroga yaqini Belgiyadagi Euroclear depozitariysi hisoblarida, yana 18 milliard va 7 milliard yevro mos ravishda Fransiya va Belgiyaning tijorat banklarida saqlanadi.

Shu tarzda, Fransiya Rossiya Markaziy bankining muzlatilgan aktivlari miqdori bo‘yicha Yevropada ikkinchi yirik davlat sanaladi. Biroq maqolada ta’kidlanishicha, Parij «ayrim boshqa Yevropa poytaxtlari noroziligiga sabab bo‘lgan holda» Rossiya aktivlari qayerda saqlanayotgani va ular bo‘yicha hisoblangan foiz daromadlari qanday ishlatilayotgani haqidagi ma’lumotni oshkor etmay, bunday ma’lumotlarning «maxfiylik tabiati»ga ishora qilmoqda.

Vaziyatdan xabardor FT’ning uch manbasi fikricha, 18 milliard yevroga yaqin mablag‘ning asosiy qismi mamlakatning eng yirik banki — BNP Paribas’da saqlanayotgan bo‘lishi mumkin. Bankning o‘zi, shuningdek yana uchta yirik fransuz banki nashrga izoh berishdan bosh tortgan.

Qayd etilishicha, ushbu aktivlar Yevrokomissiya tomonidan Ukrainaga RF Markaziy banki muzlatilgan aktivlari hisobiga «reparatsion kredit» berish rejasi tufayli «alohida e’tibor markaziga tushgan». Yevrokomissiyaning so‘nggi taklifiga ko‘ra, faqat Euroclear’da saqlanayotgan 185 milliard yevrogina emas, balki barcha YeI mamlakatlarida muzlatilgan Rossiya aktivlaridan foydalanish ko‘zda tutiladi.

FT yozishicha, fransuz amaldorlari Ukrainaga «reparatsion kredit» berish g‘oyasini qo‘llab-quvvatlayotgan bo‘lsa-da, xususiy banklarda muzlatilgan mablag‘lardan foydalanishga qarshi chiqmoqda, chunki bu banklar bilan tuzilgan shartnomalar sharoiti Euroclear bilan tuzilgan shartlardan farq qiladi.

Belgiyadagi depozitariy muzlatilgan Rossiya aktivlaridan foyda ko‘radi, ammo unda Rossiyaga foiz to‘lash bo‘yicha shartnomaviy majburiyatlar yo‘q. Ushbu tushumlar allaqachon Ukrainani 50 milliard yevroga yaqin kredit bilan ta’minlash mexanizmida qo‘llanmoqda. Shu bilan birga, xususiy banklar, odatda, depozitlar bo‘yicha yig‘ilgan foizlarning barchasini yoki bir qismini Rossiyaga to‘lab berishi kerak bo‘ladi.