O‘zini distribyutor deb tanitgan Xayrullo Shokirov yirik miqdordagi firibgarlikda gumonlanmoqda

Ijtimoiy tarmoqlarda o‘zini distribyutor deb tanitgan Xayrullo Shokirov yirik miqdordagi firibgarlikda gumonlanmoqda. Bu haqda Toshkent shahri Ichki ishlar bosh boshqarmasi matbuot xizmati xabar berdi.

IIBB huzuridagi Tergov boshqarmasi tomonidan Jinoyat kodeksining 168-moddasi 4-qismi «a» bandi (Juda ko‘p miqdordagi firibgarlik) bilan jinoyat ishi tergov qilinmoqda.

Tergov jarayonida aniqlanishicha, 1986 yilda tug‘ilgan Xayrulla Ubaydullayevich Shokirov aldash va ishonchni suiiste’mol qilish yo‘li bilan Instagram, Telegram hamda YouTube platformalarida Xayrullo Shokirov nomli profil orqali o‘zini yirik distribyutor va tadbirkor sifatida tanishtirgan.

Tarmoqlardagi sahifalarida Xayrulla Shokirov ushbu faoliyat bilan 2004 yildan buyon shug‘ullanib kelishini aytgan.

«U go‘yoki chet eldan katta miqdorda anor sharbati va salqin ichimliklar olib kirib, ularni O‘zbekiston hududidagi savdo nuqtalariga yetkazib berish vakolatiga ega ekani haqida yolg‘on ma’lumotlar tarqatgan. Fuqarolarga distribyutorlik orqali topgan daromadidan katta foizlarni va’da qilib, aldash yo‘li bilan ularning ishonchiga kirib, juda ko‘p miqdorda moddiy zarar yetkazgan», – deyiladi xabarda.

Mazkur jinoyat ishi bo‘yicha Shokirov gumonlanuvchi sifatida tergovga jalb qilingan va unga nisbatan qamoqqa olish tarzidagi ehtiyot chorasi qo‘llangan.

IIBB mazkur shaxsning jinoiy xatti-harakatlaridan jabr ko‘rganlar yoki ushbu holatlar bo‘yicha biror ma’lumotga ega bo‘lganlardan Tergov boshqarmasining 71−206−40−99, 71−206−42−52 raqamlariga yoki 102 qisqa raqami orqali murojaat qilishni so‘radi. Boshqarma murojaat jinoyatni to‘liq fosh etish va adolatni ta’minlashga xizmat qilishi mumkinligini qo‘shimcha qildi.