RF Mudofaa vazirligi: 10 soat ichida Rossiya uzra 294 ta dron urib tushirildi

Rossiya yakshanba, 4 yanvar kuni Ukraina Qurolli kuchlari dronlarining ommaviy hujumiga uchradi, bu haqda RF Mudofaa vazirligi bayonotlarida aytilgan. Idora mamlakat hududi ustida 13:00 dan 20:00 gacha bo‘lgan vaqt oralig‘ida 253 ta dron, 20:00 dan 23:00 gacha esa 41 ta uchuvchisiz qurilma urib tushirilgani haqida hisobot berdi.

Ukrainadan uchirilgan dronlarning aksar qismi Bryansk va Belgorod viloyatlari ustida urib tushirilgan — mos ravishda 86 va 57 tadan. RFning Ukrainadan eng uzoq hududi sifatida Vladimir viloyati qayd etilgan: Mudofaa vazirligi xabariga ko‘ra, u yergacha 3 ta dron yetib kelgan. Tver viloyati ustida ikkita dron urib tushirilgan.

Bu 4 yanvar kuni Mudofaa vazirligi xabar bergan birinchi dronlar hujumi emas — tushgacha ham idora 140 ta ukrain droni urib tushirilgani haqida hisobot bergan edi.

RF Mudofaa vazirligi faqat urib tushirilgan dronlar haqida hisobot berdi, lekin yerdagi oqibatlar haqida aytmadi. Ayni paytda, Lipetsk viloyatidagi Yelets shahri aholisi va OAV “Energiya” AJ korxonasi hujumga uchragani va u yerda yong‘in chiqqani aks etgan kadrlarni e’lon qilmoqda. Buni Astra nashrining OSINT-tahlili ham tasdiqlaydi. Keyinroq hudud gubernatori Igor Artamonov Yeletsning “sanoat hududi”dagi “yonish” o‘t o‘chiruvchilar tomonidan mahalliylashtirilgani haqida hisobot berdi. “Dastlabki ma’lumotlarga ko‘ra, halok bo‘lganlar va jabrlanganlar yo‘q”, — deb yozdi u 5 yanvarga o‘tar kechasi Telegram’da.

Kadrlarda korxona hududidan ko‘tarilayotgan katta tutun bulutlari ko‘rinadi. Hujum oqibatlarining tafsilotlari noma’lum. Lipetsk viloyati gubernatori Igor Artamonov kun davomida faqat hudud bo‘yicha havo hujumidan ogohlantirish rejimi joriy etilishi va bekor qilinishi haqida xabarlar bilan cheklandi.

Ochiq ma’lumotlarga ko‘ra, “Energiya” AJ maishiy va umumsanoat texnikasi uchun kimyoviy tok manbalari — xususan, batareya va akkumulyatorlar ishlab chiqarishga ixtisoslashgan. Rossiyadagi “Sudprom” ANO ma’lum qilishicha, “Energiya” raketa-artilleriya majmualari, aviatsiya, harbiy-dengiz floti, fuqarolik daryo va dengiz floti hamda radiotexnika uchun quvvat manbalarini ishlab chiqaradi.

Astra yozishicha, Lipetsk viloyatidagi mazkur zavodda boshqa mahsulotlar qatori Rossiya dronlari uchun akkumulyatorlar ham ishlab chiqariladi. RFning Ukrainaga keng ko‘lamli hujumi boshlanganidan beri korxona bir necha bor dron hujumlariga uchragan, ammo bu zavod ishiga jiddiy ta’sir ko‘rsatmagan.

Dronlar hujumi natijasidagi zararlar haqida Kursk viloyati hokimiyati xabar berdi. Gubernator Aleksandr Xinshteynning aytishicha, bir dron Plevitskaya shohko‘chasidagi yangi qurilayotgan uyga urilgan. O‘sha paytda qurilish maydonida hech kim bo‘lmagani uchun jabrlanganlar bo‘lmagan, deya aniqlik kiritdi u.

Moskva tomon uchib kelayotgan ko‘plab dronlar urib tushirilgani haqida Rossiya poytaxti meri Sergey Sobyanin ham hisobot berdi. Kun davomidagi har bir shunday postga u “favqulodda xizmatlar mutaxassislari parchalar tushgan joyda ishlamoqda” degan ibora yozib borgan, ammo yerdagi zararlar haqida tafsilot keltirmagan. RF Mudofaa vazirligi Moskva viloyati ustida 46 ta dron urib tushirilganini ma’lum qildi.

Kun davomida Moskvada aeroportlar vaqtincha ishini to‘xtatgan. Xususan, Vnukovo xalqaro aeroporti bir kunda ikki marta cheklovlar joriy etilganini xabar qildi. Mahalliy vaqt bilan soat 20:00 ga kelib aeroport ishi odatiy rejimga qaytishni boshlagan.