Qarorga muvofiq, “Farg‘ona” turistik-rekreatsion zonasi (turistik zona) hududning turizm salohiyatini oshirish, servis xizmatlarini kengaytirish va yangi ish o‘rinlari yaratishga qaratilgan loyihalarni bir tizimda yo‘lga qo‘yish uchun tashkil etiladi. Turistik zona 30 yil muddatga ta’sis etilib, keyinchalik uning faoliyat muddatini uzaytirish imkoniyati ham nazarda tutilgan.
Hujjatda agroturizm yo‘nalishiga alohida e’tibor qaratilgan. Xususan, Farg‘ona tumanida “Vodil” malina agroturizm klasterini turistik obektga aylantirish uchun zarur infratuzilma yaratish belgilangan. Bu jarayonga salohiyatli tadbirkorlarni jalb etgan holda, malina bog‘lari (plantatsiyalari) hududida yengil konstruksiyali xizmat ko‘rsatish obektlari tashkil etilishi ko‘zda tutilgan.
Shuningdek, 2026–2027 yillarda Yozyovon tumanida Markaziy Farg‘ona suv ombori atrofidagi yer maydonlarida turizm xizmatlarini tashkil etish orqali ish o‘rinlari yaratish rejalashtirilgan. Bu hududlarda dam olish, xizmat ko‘rsatish va turizm infratuzilmasini bosqichma-bosqich shakllantirish maqsad qilingan.
Qarorda yana bir muhim yo‘nalish sifatida Farg‘ona tumanidagi “Sanoat” va “Hosilot” MFY hududlarida xorijiy mamlakatlarning ijobiy tajribasi asosida malina plantatsiyalarini tashkil qilish, muzlatkichlar hamda chuqur qayta ishlash sexlarini qurish orqali agroturizm xizmatlarini yo‘lga qo‘yish belgilangan.
Mazkur tashabbuslar hududda turizm va agrosanoat kooperatsiyasini kuchaytirish, tadbirkorlikni qo‘llab-quvvatlash hamda mahalliy aholi bandligini oshirishga xizmat qilishi kutilmoqda.
