Rossiyaning Ukrainaga zarbalari: Xarkivda kamida ikki kishi halok bo‘ldi

Seshanbaga o‘tar kechasi, 13 yanvarda Rossiya qo‘shinlari Ukraina hududlariga navbatdagi zarbalarni berdi. Xarkiv viloyati harbiy ma’muriyati (VHM) rahbari Oleg Sinegubov Telegram’da xabar qilishicha, Xarkiv atrofidagi hududga qilingan hujum oqibatida ikki kishi halok bo‘lgan. VHM rahbari aniqlashicha, yana ikki nafar erkak jarohatlar bilan shifoxonaga yotqizilgan.

Xarkiv shahar meri Igor Terexov shahar markazidagi binoga Shahed turidagi dron urilganini ma’lum qildi. “Xarkivning Shevchenko tumanidagi bolalar sanatoriysiga dron urilgani qayd etildi. Voqea joyida yong‘in”, — deyiladi uning xabarnomasida. Bu zarba oqibatida jabrlanganlar bor-yo‘qligi haqida xabar berilmagan.

Ukraina poytaxtida portlashlar bo‘lgani va havo hujumidan mudofaa (HHM) tizimi ishlayotgani haqida Kiyev meri Vitaliy Klichko xabar qildi. “Xavfsiz joylarda bo‘ling! Rossiyaliklar poytaxtga ballistik raketalar bilan hujum qilyapti!” — deb yozdi Kiyev viloyati harbiy ma’muriyati rahbari Timur Tkachenko Telegram’da.

Ma’lumot e’lon qilingan paytda Rossiyaning raketa hujumi oqibatlari haqida rasmiy xabar berilmagan, ammo mahalliy pabliklar Kiyev atrofida — Irpen, Bucha va Gostomel shaharlarida deyarli to‘liq elektr ta’minoti uzilib qolgani va suv ta’minotida muammolar borligi haqida yozgan. Elektr ta’minotidagi uzilishlar poytaxtning ayrim tumanlarida ham qayd etilgan.

Ukraina Qurolli kuchlari Havo kuchlari xabarlariga ko‘ra, Rossiya qo‘shinlari Ukrainaning janubi, sharqi va markaziga keng ko‘lamda hujum qilmoqda. Dastlabki ma’lumotlarga binoan, ikki mintaqaga tegishli eng yirik issiqlik elektr stansiyalari ballistik raketa zarbasiga uchragan: Kiyev viloyatidagi Tripil IES va Dnipropetrovsk viloyatidagi Kriviy Rig IES.