Tashqi ishlar vazirligi va xorijdagi diplomatik vakolatxonalar faoliyati qayta ko‘rib chiqiladi. Bu haqda 15 yanvar kuni bo‘lib o‘tgan yig‘ilishda prezident Shavkat Mirziyoyev ma’lum qildi.
Davlat rahbari nutqining boshida uchrashuv keskin geosiyosiy o‘zgarishlar va davlatlar suverenitetiga tahdidlar kuchayib borayotgan bir sharoitda o‘tayotganini ta’kidladi.
«Bunday sharoitda tashqi siyosat sohasidagi faoliyatimizni tanqidiy muhokama qilib, Tashqi ishlar vazirligi va xorijdagi diplomatik vakolatxonalar faoliyatini yangicha tashkil qilish kerakligini davrning o‘zi taqozo etmoqda», – dedi u.
Prezident tashqi siyosat borasida 2025 yil ko‘p jihatdan natijador bo‘lganini qayd etdi. Xususan, o‘tgan yili 26 ta xorijiy davlatga oliy darajadagi tashriflar amalga oshirildi. Ilk bor Bolgariya, Finlyandiya, Slovakiya, Serbiya, Iordaniya va Paragvay rahbarlarining O‘zbekistonga tashriflari tashkil etildi.
Davlat rahbarining so‘zlariga ko‘ra, «Markaziy Osiyo plyus» formatidagi ko‘p tomonlama muloqotlar sermahsul bo‘ldi. So‘nggi yillarda 11 ta davlat bilan strategik sheriklik munosabatlari o‘rnatilib, ularning umumiy soni 19 taga yetdi. Qozog‘iston, Ozarboyjon, Tojikiston bilan ittifoqchilik munosabatlari yo‘lga qo‘yildi.
«Ochiq, pragmatik, puxta o‘ylangan va tashabbuskor tashqi siyosatimiz natijasida O‘zbekiston global tinchlik va diplomatiya markazlaridan biriga aylanib boryapti», – deb ta’kidladi Shavkat Mirziyoyev.
Xorijiy davlatlarda 2017 yildan buyon 16 ta yangi diplomatik va konsullik vakolatxonasi ochilib, ularning soni 60 taga, diplomatik aloqa o‘rnatilgan davlatlarning soni esa 165 taga yetgan.
Davlat rahbari yig‘ilishda chet eldagi elchixonalar, konsullik muassasalari va xalqaro tashkilotlar huzuridagi vakolatxonalar shtatlari, ular va Tashqi ishlar vazirligi xodimlarining oylik ish haqi ko‘paytirilganini qayd etdi.
Shu bilan birga, prezident ularning ishi samaradorligiga shubha bildirdi.
«Lekin barcha diplomatik vakolatxonalarimiz buni to‘g‘ri anglab, mavjud imkoniyatlarni to‘liq ishga solyaptimi? Diplomatik faoliyatni baholashning bitta o‘lchovi bor, u ham bo‘lsa – natija!», dedi davlat rahbari.
Uning so‘zlariga ko‘ra, hozirgi sharoitda elchi degani faqat siyosiy muloqot yurituvchi shaxs emas.
