Xorazmda odamlarni qo‘rqitib, ularni kaltaklagan shaxslar qo‘lga olindi

Xorazm viloyati IIB va DXX xodimlari tomonidan qonunsiz ko‘cha muhitini shakllantirib, fuqarolarni qo‘rqitish va zo‘ravonlik orqali nazoratda ushlashga urinib kelgan bir guruh shaxslar qo‘lga olindi. Bu haqda IIV matbuot xizmati xabar bermoqda.

Xususan, tanishlari va yoshlar o‘rtasida «Jommi Darital» laqabi bilan tanilgan 29 yoshli J.A. Urganch shahar markaziy dehqon bozori hududida 27 yoshli yigitning yo‘lini to‘sib, turli bahonalarni ro‘kach qilib, uni hech qanday sababsiz tanasining turli joylariga urib, tan jarohati yetkazgan.

Jabrlanuvchining ichki ishlar organlariga murojaati asosida surishtiruv boshlanganidan so‘ng, J.A. unga ruhiy va jismoniy bosim o‘tkazishga uringan. Shundan keyin tezkor xodimlar tomonidan ushlangan J.A.ning yonlari ko‘zdan kechirilganida, og‘irligi 3 gramm bo‘lgan marixuanani qonunga xilof ravishda saqlab yurgani aniqlanib, ashyoviy dalil sifatida rasmiylashtirib olingan.

Yana bir holatda ilgari Jinoyat kodeksining 277-moddasi (Bezorilik) bilan sudlangan, «Malish» laqabli 28 yoshli A.M. 18 yanvar kuni Bog‘ot tumanida 27 yoshli yigitni oldiga chaqirib, kelmaganini bahona qilib, uning yashash xonadoniga borgan. U yerda yigitning erkiga xilof ravishda uyiga kirib, tanasining turli joylariga urib, jarohat yetkazgan.

Shuningdek, «Rasul qilich» laqabi bilan tanilgan R.F. 13 yanvar kuni Xiva-Urganch yo‘nalishida kirakashlik qilib kelayotgan 41 yoshli erkakni ta’qib qilib, uning yo‘lini to‘sgan va avtomashinadan tushganidan keyin tanasining turli joylariga urib-tepib, jarohat yetkazgan. Janjalni to‘xtatishga uringan 44 yoshli erkak ham zo‘ravonlikka uchragan.

Uchta holatda ham gumonlanuvchilarga nisbatan Jinoyat kodeksining 277-moddasi 3-qismi (Bezorilik) bilan, J.A.ga esa qo‘shimcha ravishda 276-moddasi (Giyohvandlik vositalari, ularning analoglari yoki psixotrop moddalarni o‘tkazish maqsadini ko‘zlamay qonunga xilof ravishda tayyorlash, egallash, saqlash va boshqa harakatlar) 2-qismi bilan jinoyat ishi qo‘zg‘atilib, dastlabki tergov harakatlari olib borilmoqda.

Gumondorlar ehtiyot chorasi sifatida qamoqqa olingan.

Yuqoridagi shaxslarning xatti-harakatlaridan jabr ko‘rgan fuqarolardan ichki ishlar organlariga murojaat qilish so‘ralmoqda.