Rossiyada yadroviy zarbadan himoya qiluvchi bunker ishlab chiqqan muhandis ushlandi

Butunrossiya himoya chora-tadbirlarini takomillashtirish ilmiy-tadqiqot markazi rahbari, “Kub-M” yadroviy bunkerini ishlab chiqqan Nikolay Posoxov hamda institut rahbarining o‘rinbosari Igor Sosunov “yirik miqdorda pora olganlik” ayblovi bilan ushlangan. Bu haqda shanba, 31 yanvar kuni RBK agentligi xabar berdi.

Xabarda aytilishicha, jinoyat ishi bo‘yicha dastlabki tergov doirasida tergov organlari suddan Posoxovni uy qamog‘iga yuborishni, Sosunovni esa qamoqqa olishni so‘raydi. Bu haqda RBKga huquqni muhofaza qiluvchi idoralardagi ikki manba aytgan.

Agentlik suhbatdoshlari ma’lum qilishicha, Rossiya Tergov qo‘mitasining Bosh tergov boshqarmasi Moskvadagi Zamoskvoreche tuman sudiga har ikki ayblanuvchiga nisbatan ehtiyot chorasini tanlash haqida iltimosnoma yuborgan. Ularga 15 yilgacha ozodlikdan mahrum qilish jazosi tahdid solyapti. Ayblovning boshqa tafsilotlari va detallari keltirilmagan.

Avvalroq Nikolay Posoxov RBKga bergan intervyusida aytganidek, ilmiy institut modulli himoya inshooti — “Kub-M” ustida 2015 yilda, Rossiya FVV buyurtmasi asosida ish boshlagan. Uning standart to‘plami ikki moduldan iborat: 54 kishiga mo‘ljallangan joy (xona), texnik blok.

Seriyali ishlab chiqarish 2024 yil kuzida Nijniy Novgorod viloyatining Dzerjinsk shahrida boshlangani ta’kidlanadi. Ma’lum qilinishicha, bu bunker himoyaning uch darajasini ta’minlashi mumkin: boshpana — oddiy zarar yetkazuvchi vositalarning fugas (portlash to‘lqini) va parcha ta’siridan himoya, radiatsiyaga qarshi boshpana — radiatsiyadan himoya, to‘liq panohgoh — yadroviy, kimyoviy va biologik qurollardan himoya.

Posoxovning aytishicha, “Kub-M” maksimal komplektatsiyada zamonaviy raketalarning to‘g‘ridan to‘g‘ri zarbasidan ham himoya qilishga qodir — jumladan HIMARS raketasining bevosita urishiga qarshi ham, shuningdek yadroviy zarbaning oqibatlaridan ham muhofaza qilishi mumkin.