Zelenskiy hududiy masalani hal qilishning asosiy shartini aytdi

Rossiya prezidenti Vladimir Putin bilan to‘g‘ridan-to‘g‘ri muloqotsiz Ukraina bo‘yicha hududiy masalani hal qilishning imkoni yo‘q, dedi Ukraina prezidenti Volodimir Zelenskiy Český rozhlas radiosiga bergan intervyusida.

Uning so‘zlariga ko‘ra, Kiyev Rossiya va AQSh ishtirokidagi turli shakllardagi muzokaralar uchun ochiq. Ammo davlat rahbarlari darajasidagi bevosita muloqot hududiy masalalarni muhokama qilishning asosiy sharti hisoblanadi. 

«Rossiya rahbari bilan kamida u yoki bu shaklda muloqot qilish imkoniyatiga ega bo‘lishimiz lozim. Busiz jamoalarimiz hududiy masalalarda kelisha olmaydi», — deb ta’kidladi Ukraina yetakchisi.

Zelenskiyning qayd etishicha, muzokaralar murakkab bosqichda bo‘lib, ularning yakuni aniq emas.  U shuningdek, tinchlik rejasi doirasida Rossiya bilan «hududlar almashinuvi» haqidagi xabarlarga ham izoh berdi. 

«Bu haqda ayrim siyosatchilardan eshitdim, lekin prezident Trampdan emas», — dedi u.

AQSh davlat kotibi Marko Rubioning bildirishicha, Donbass masalasida Rossiya va Ukraina orasida hali ham «jarlik» bor, ammo muammolarning bir qismini markazlashtirishga erishildi.  

Moskva Donbass, Zaporijjya va Xersondan ukrain qo‘shinlari olib chiqib ketilishi, bu viloyatlar hamda Qrimni Rossiyaga tegishli deb tan olishni talab qilmoqda. Kiyev esa o‘z hududlarini Rossiyaga berib qo‘ymasligini ta’kidlamoqda.