Estoniya Rossiya bilan chegaradagi ikki punktda harakatni cheklaydi

Estoniya Rossiya bilan chegarada joylashgan “Luxamaa” va “Koydula” nazorat-o‘tkazish punktlari orqali tungi harakatni uch oyga yopadi. Cheklovlar 24 fevraldan kuchga kiradi, deb xabar qildi hukumat payshanba, 5 fevral kuni.

Tallinda tushuntirishlaricha, qarorga “Rossiyadan kelib chiqayotgan chegara hodisalari” sabab bo‘lgan. Ushbu o‘tkazish punktlari endi kuniga 12 soat ishlaydi, tunga yopilishi esa chegara qo‘riqlashga ko‘proq resurs ajratish imkonini beradi, deya bildirdi Estoniya hukumati.

Estoniya bosh vaziri Kristen Mixal Rossiyaning chegaradagi ayrim harakatlari ba’zan “irratsional” bo‘lishini va bunday holatlarni e’tiborsiz qoldirib bo‘lmasligini ta’kidladi. “Rossiya yo‘nalishida to‘liq bojxona nazorati saqlanib qoladi”, — dedi u. Bosh vazir qo‘shimcha qilishicha, Tallin xavfsizlik ehtiyojlari va vaziyat rivojidan kelib chiqib keyingi qarorlarni qabul qiladi.

Estoniya ichki ishlar vaziri Igor Taroning so‘zlariga ko‘ra, Rossiya chegarachilarining xulq-atvori politsiya va chegara qo‘riqlash departamentidan doimiy ravishda qo‘shimcha resurslar hamda yuqori e’tibor talab qilmoqda. Uning aytishicha, chegaradan o‘tishlar soni sezilarli kamaygan bir sharoitda o‘tkazish punktlaridagi yuklamani qisqartirish — mantiqiy qadam.

Vazir keltirgan raqamlarga ko‘ra, 2018 yilda Estoniyaning sharqiy chegarasini 5,3 million kishi kesib o‘tgan bo‘lsa, 2025 yilda bu ko‘rsatkich bir milliondan sal ko‘proq darajaga tushib ketgan.