«MYu»da g‘alabali seriya, Palmerda tarixiy het-trik, Yamalda rekord. Kun o‘yinlari

Angliya: «Tottenhem» sardorining qizil kartochkasi hal qildi

«Manchester Yunayted» – «Tottenhem»
Gollar: Mbemo, 38 (1:0). Brunu Fernandesh, 81 (2:0)
«Manchester Yunayted»: Lammens, Maguayr, Martines, Shou (Mazraviy, 87), Dalot, Kazemiro (Ugarte, 87), Maynu (Fletcher, 90+2), Brunu Fernandesh, Kunya (Sheshko, 75), Diallo, Mbemo (Zirkze, 87)
«Tottenhem Hotspur»: Vikario, Romero, van de Ven, Palinya (Bissuma, 80), Gallaher (Tel, 80), Sarr, Udoji (Souza, 55), Grey, Simons, Odober (Dregushin, 32), Solanke (Kolo Muani, 80)
Ogohlantirishlar: Diallo, 45 – Udoji, 27. Palinya, 70
Chetlatish: Romero, 29

Yaxshi formaga kirib olgan «MYu» (qatorasiga uch g‘alaba) asosiy tarkibni o‘zgartirmayapti. Kerrik yana Sheshkoni zaxira o‘rindig‘ida qoldirdi, hujum markazida esa Kunya va Mbeumo almashib harakat qilishdi. Ularning ikkinchisi himoyalanishda chap qanotni yopmoqda, to‘pga egalik qilinganida esa hujum vakillaridan istalgan biri oldinda ochilishi mumkin. Futbolchilarning bunday joylashuvida «MYu» dastlabki 15 daqiqalikda «Tottenhem»dan yaxshiroq ko‘rindi va jamoada bir necha yaxshi hujumlar uyushtirildi.

Keyin esa «Tottenhem» ham oldinga o‘tdi va qaysidir daqiqalarda to‘p Lammens qo‘riqlayotgan darvoza atrofidan ketmay ham qoldi. Ammo o‘yin taqdirini Romero ishlatgan fol hal qildi. «Tottenhem» sardori to‘pga o‘ynashga harakat qilib, butsasining ostki qismi bilan Kazemironing to‘piq qismiga zarba berib yubordi. O‘yin bosh hakami Maykl Oliver shu zahoti cho‘ntagidan qizil kartochkani chiqardi.

VAR vaziyatga aralashmadi, ammo barchasi yaqqol ko‘rinib turgandi: zarbadan keyin Kazemironing oyog‘i qayrilib ham ketgandi. Romero APLning bu mavsumida allaqachon ikki qizil kartochka olgan ilk futbolchiga aylandi. Argentinalik himoyachi dekabrda «Liverpul»ga qarshi o‘yinda ikki sariq kartochka olib, maydondan chetlatilgandi.

Bu epizoddan ko‘p o‘tmay «MYu» hisobni ochdi. Bu gol burchak zarbasini oldindan rejalashtirgan holda ijro etish orqali amalga oshirildi. Maynu darvozaning yaqin ustuni oldida turgancha o‘ziga kelgan to‘pni bir teginishda jarima maydoni markaziga yo‘naltirdi, u yerda bo‘sh turgan Mbeumo yerlatib aniq zarba yo‘lladi. Bu «qizil iblislar» uchun joriy mavsumda burchak zarbalari orqali urilgan sakkizinchi golga aylandi.

Ikkinchi bo‘lim «MYu» uchun juda qulay sharoitda kechdi. Mezbonlar yana bir necha bor darvozani ishg‘ol etishdi, ammo har safar kichik ofsayd holatlari tufayli bu gollar bekor qilindi. 

Bu orada «Tottenhem» navbatdagi zarbani qabul qildi – Udoji jiddiy jarohat olib, maydonni tark etdi. O‘yindan oldin «shporlar» lazaretida shusiz ham 10 nafar futbolchi yotgandi, endi jamoa Romero va Udojidan ham ayrildi. Tomas Frank keyingi o‘yinga tarkib yig‘ishi ham qiyin bo‘ladi.

Mezbonlar shundan keyin uzoq masofalardan zarbalar yo‘llashga kirishdi: Shou, Dalot va Fernandesh hisobni 2:0 ko‘rinishiga keltirishi mumkin edi, ammo Vikario har safar jamoasini qutqardi. Ikkinchi bo‘limda zarbalar soni bo‘yicha ko‘rsatkich 12:2 ko‘rinishiga yetdi.

O‘yin oxirida Frank va-bankka qo‘l urib, o‘n kishi bo‘lgan holda mag‘lubiyatdan qutulib qolish uchun uchtalik almashtirish amalga oshirdi va hujumga urg‘u qaratdi. Ammo bu ish bermadi – bu o‘zgarishlardan o‘n daqiqa o‘tib Fernandesh Dalotning uzatmasidan keyin darvozani ishg‘ol etdi. Portugaliyalik yarimhimoyachi so‘nggi ikki oyni juda kuchli o‘tkazmoqda: u sakkiz turda «gol+pas» bo‘yicha 4+7 natijasini qayd etgan. U hozirda bir mavsumdagi assistlar soni bo‘yicha APL rekordini o‘rnatishni ko‘zlagan: hozirda undagi golli uzatmalar soni 12 tani tashkil etdi va bu borada rekordchi de Bryuynega (20) yetish uchun qolgan 13 turda 8 assist amalga oshirishi kerak bo‘ladi. 

Hozircha esa Fernandesh APLdagi golli harakatlari sonini 200 taga yetkazish (104 gol va 94 assist) bilan cheklandi.

Bu g‘alabadan keyin «MYu» kuchli to‘rtlikdagi o‘rnini mustahkamladi.

Endi seshanba oqshomida butun dunyodagi muxlislar e’tibori «MYu»ning «Vest Hem»ga qarshi safar o‘yiniga qaratiladi. Agar «Yunayted» bu o‘yinda qatorasiga beshinchi g‘alabasiga erishadigan bo‘lsa, jamoaning shu mavsumda mashhur bo‘lib ketgan muxlisi (sevimli jamoasi qatorasiga besh g‘alaba qayd etmagunicha sochini oldirmaslikka va’da bergan va qariyb 500 kundan buyon sochi o‘sib ketgan muxlis) nihoyat sartaroshga borishi mumkin bo‘ladi.

«Arsenal» – «Sanderlend» 3:0
Gollar: Subimendi, 42 (1:0). Yokeresh, 66 (2:0). Yokeresh, 90+3 (3:0)
«Arsenal»: Rayya, Saliba, Gabriel Magalyayns, Kalafiori (Inkapiye, 67), Timber, Subimendi, Rays, Havers (Eze, 67), Trossar (Norgar, 89), Madueke (Martinelli, 60), Gabriel Jyezus (Yokeresh, 60)
«Sanderlend»: Rufs, Ballard, Alderete, Mandava, Mukiyele, Diarra, Sadiki (Gertreyda, 71), Le Fe, Talbi (Mandl, 64), Hyum (Angulo, 85), Brobbi (Izidor, 85)
Ogohlantirishlar: Saliba, 26 – Diarra, 39. Brobbi, 40

Bu mavsumda bir necha bor grand raqiblardan ochko tortib olishga erishgan «Sanderlend» «Emireyts»dagi o‘yinning birinchi bo‘limida darvozasi daxlsizligini saqlab qolishga yaqin edi, ammo bo‘lim oxirida «qora mushuklar» jamoasi o‘z jarima maydoniga qamalib oldi va mezbonlar bunga uzoq masofadan zarba yo‘llash orqali chora topdi. Trossardan to‘pni qabul qilib olgan Subimendi jarima maydoni tashqarisidan butsasining tashqi qismi bilan yo‘llagan zarbasi orqali hisobni ochdi – zarba texnik jihatdan shu qadar mukammal bo‘lib chiqdiki, to‘p darvozabonga hech qanday imkoniyat qoldirmasdan, ustun yonidan darvoza to‘riga kirdi.

Ispaniyalik yarimhimoyachi o‘z golini jarohat tufayli mavsum oxiriga qadar safdan chiqqan jamoadoshi Merinoga bag‘ishladi.

Ikkinchi bo‘limda esa mehmonlar himoyadan chiqishda xatoga yo‘l qo‘ydi, to‘pni egallab olgan Trossar golli hujumni boshlab berdi va jarima maydoni yaqinidagi Haversni to‘p bilan ta’minladi, u esa jarima maydoni ichida ochilgan Yokereshga golli uzatma berdi. Germaniyalik yarimhimoyachi uzoq vaqt jarohatini davolab, safga qaytganidan keyingi qisqa muddatda 4 golli harakatni (2+2) amalga oshirdi, uning ikki pasi ham shvetsiyalik hujumchiga uzatilgan.

O‘yinga qo‘shib berilgan daqiqalarda Yokeresh dublni rasmiylashtirdi. Mavsumning birinchi yarmida moslashish jarayonida bo‘lgan shvetsiyalik hujumchi yaxshi sport formasiga kirib bormoqda. 2026 yil boshidan buyon u barcha turnirlar doirasida olti gol urishga erishdi, uning mavsum boshidan buyon barcha turnirlar doirasida urgan gollari soni esa 13 tani tashkil etmoqda (ikkinchi o‘rindagi Martinellida 10 ta gol).

Ketma-ket ikkinchi o‘yindagi yirik g‘alabadan keyin Arteta shogirdlari turnir jadvalidagi birinchi o‘rinni mustahkamlab oldi. «Arsenal» 2003/04 yillar mavsumidan buyon ilk bor o‘yin kunini ikkinchi o‘rindan 9 ochkolik farq bilan yakunlashga erishdi. Bugun «Siti» «Liverpul»ga qarshi safar o‘yinida yutqazadigan bo‘lsa, ikkinchi o‘rin bilan oradagi farq 9 ochkoligicha qoladi.

Hozircha chempionlik haqida gapirishga biroz erta, lekin «kanonirlar» uyda 44 o‘yindan buyon chempionshipdan chiqqan jamoalarga yutqazmayapti (+39=5) va bu orqali «Chelsi» tomonidan 2001-2015 yillarda o‘rnatilgan rekordga barham berildi.

«Bornmut» – «Aston Villa» 1:1
Gollar: Rodjyers, 22 (0:1). Rayan, 55 (1:1)
«Bornmut»: Petrovich, Senesi, Hill, Tryuffer, Himenes (Smit, 86), Kuk, Skott, Krupi (Kristi, 65), Adli, Rayan (Bruks, 87), Evanilson (Yunes Unal, 90)
«Aston Villa»: Martines, Konsa, Mings, Din (Bogard, 86), Kesh, Duglas Luis (Matsen, 77), Onana, Buendiya (Beyli, 66), Rodjyers, Sancho (Barkli, 77), Uotkins (Abraham, 86)
Ogohlantirishlar: Ximenes, 35 – Buendiya, 35

O‘tgan turda «Aston Villa» o‘z uyida kutilmaganda «Brentford»ga yutqazib qo‘ygandi. Ammo o‘sha o‘yinga birminghemliklarning tarkibidagi muammolarni inobatga olgan holda qaralsa, bu u qadar sensatsiya emasligini ko‘rish mumkin. Jamoa hujumchilaridan biri Malen Italiyaga yo‘l oldi, shuningdek, Unai Emeri jarohatlar tufayli yarimhimoyadagi qator futbolchilaridan ayrilgan – Kamara mavsum oxiriga qadar safdan chiqdi, jamoa sardori Makginn hamda Tilemans ham jamoaga yordam bera olmayapti.

Bunday vaziyatda o‘tgan yil oxiridan buyon gol urmay qo‘ygan Rodjyersga gol sezish qobiliyati qaytishi ayni muddao bo‘ldi. U birinchi bo‘lim o‘rtalarida Sanchoning raqib himoyachilari orasidan o‘tkazib bergan nozik uzatmasidan keyin darvoza to‘rini kuchli zarba bilan o‘qqa tutdi. Ammo ikkinchi bo‘lim boshida «Bornmut» safida ham o‘z qahramoni topildi – qishki transferlar doirasida «Vaska da Gama»dan 28,5 million yevroga xarid qilingan Rayan hisobni tenglashtirdi.

19 yoshli braziliyalik o‘tgan turda APLda zaxiradan tushib, debyut qilgan va golli pas muallifi bo‘lgandi. Endi Mark Silva uni boshlang‘ich tarkibga kiritdi va u yana ishonchni oqladi. Rayan tashabbusni o‘z qo‘liga olib, o‘ng qanotdan jarima maydoniga kirib bordi va raqibning bir necha futbolchisi orasidan osonlik bilan o‘tib ketib, yaqin burchakka yo‘llagan zarbasi bilan darvozabonni ham dog‘da qoldirdi. «Villa» navbatdagi ochko yo‘qotishdan keyin ham uchinchi o‘rinda qolmoqda, ammo jamoaning o‘z ta’qibchilari bilan oradagi farqi qisqarishda davom etmoqda: jamoa so‘nggi besh turda 10 ochko yo‘qotdi (1 g‘alaba, 2 durang, 2 mag‘lubiyat).

«Vulverhempton» – «Chelsi» 1:3
Gollar: Palmer, 13 – penalti (0:1). Palmer, 35 – penalti (0:2). Palmer, 38 (0:3). Arokodare, 54 (1:3)
«Vulverhempton»: Joze Sa, S. Bueno, Moskera, U. Bueno, Doerti (R. Gomesh, 46), Gomes (Pedro Lima, 90+1), A. Gomesh (Bellegard, 80), Armstrong, Mane, Hvang Hi Chhang (Kreychi, 43), Arokodare
«Chelsi»: Sanches, Chaloba, Fofana, Kukurelya, Gyusto (Achimpong, 75), Santos (Hato, 84), Kaysedo, Fernandes, Pedru Netu, Palmer (Garnacho, 61), Joao Pedro (Delap, 75)
Ogohlantirishlar: Armstrong, 45 – Kukurelya, 73

Peshqadamlar guruhidagi eng oson o‘yin «Chelsi»da bo‘ldi, londonliklar birinchi bo‘limning o‘zida «Vulverhempton» mudofaasini yakson etishdi, Palmerga esa het-trik rasmiylashtirish uchun 25 daqiqa yetarli bo‘ldi. Koul avvaliga ikki penaltini aniq ijro etdi, bo‘lim oxirlarida Kukurelyaning uzatmasini golga aylantirdi. Bu orqali kun qahramoni ikki bor tarixga kirdi. Birinchi navbatda, u turnir tarixida uchta o‘yinda birinchi bo‘limning o‘zida uchtadan gol urgan ilk futbolchiga aylandi. Ikkinchidan, APLdagi het-triklar soni bo‘yicha (4) «Chelsi» klubi rekordchisiga aylandi. Ushbu yarimhimoyachi gollaridan birini quloqlarini qo‘llari bilan yopgan holda nishonladi, bu orqali u o‘zi tug‘ilib o‘sgan Manchester shahriga qaytib, «MYu»ga o‘tishni istayotgani haqidagi mish-mishlarga munosabat bildirdi.

Ispaniya: Bernalning ilk goli

«Barselona» – «Malyorka» 3:0
Gollar: Levandovski, 29 (1:0). Yamal, 61 (2:0). Bernal, 83 (3:0)
«Barselona»: X. Garsiya, Kubarsi, E. Garsiya, Balde, Kunde, Fermin Lopes (Markes, 84), Kasado, Olmo (Bernal, 67), Reshford (Torres, 67), Yamal (Joau Kanselu, 78), Levandovski (Barji, 78)
«Malyorka»: Roman, Valent, Lopes, Mohika, Maffeo, Maskarel, Koshta (Morlanes, 77), Pablo Torre (Sanches, 62), Virhili (Darder, 62), Morey (Jozef, 62), Murichi (Lyabres, 77)

«Barselona» la liganing 23-turi arafasida turnir jadvalida peshqadamlik qilayotgandi, ammo «Real» atigi bir ochkolik farq bilan ta’qib etib kelmoqda.

Bunday vaziyatda Hans-Diter Flik jamoasi «Malyorka»ni mag‘lub etishi talab etilardi. Raqib turnir jadvalining 13-o‘rnida – xavfli hududdan ikki ochkolik masofada joylashgan. «Malyorka» bu mavsumda safar o‘yinlarini juda yomon o‘tkazmoqda – chempionatning safardagi 11 o‘yinida birgina g‘alaba. «Barsa» esa uydagi 10 o‘yinda 10 g‘alabaga ega edi.

«Barselona» bu o‘yinda ham o‘z an’anasiga ko‘ra birinchi bo‘lib gol o‘tkazib yuborishiga bir baxya qoldi. O‘yinning 21-daqiqasigacha mehmonlar to‘rt bor zarba berishdi, mezbonlarda esa atigi bir zarba bo‘ldi. Faqat bo‘lim o‘rtalariga borib kataloniyaliklar tashabbusni o‘z qo‘liga ola boshladi va bunda Reshford asosiy ishni bajardi. Uning uzoq masofadan yo‘llagan dastlabki zarbasi mehmonlar uchun ogohlik qo‘ng‘irog‘i bo‘lgandi, ikkinchi zarbasidan keyin to‘p himoyachiga tekkan holda yo‘nalishini o‘zgartirdi va Levandovskiga borib tushdi, polshalik hujumchi chempionatning bu mavsumidagi o‘ninchi golini urishga erishdi.

Ikkinchi bo‘lim boshlarida esa Yamal ham mavsumdagi gollari sonini o‘ntaga yetkazib qo‘ydi. Burchak zarbasi ijro etilganidan keyin u uzoq masofadan to‘pni aylantirib burchakka yo‘naltirdi, darvozabon esa reaksiya ko‘rsatishga ham ulgurmadi. Endi Hansi Flik jamoasida birdaniga uch nafar futbolchi (Levandovski, Yamal, Ferran Torres) kamida o‘ntadan gol urgan. Yetakchi ligalarda bunday natija bilan faqat «Bavariya» maqtana oladi (Keyn, Olise, Dias).

Lamin uchun bu o‘z faoliyatida ilk bor la liganing bir mavsumida 10 gol urishi bo‘lmoqda. Bundan tashqari, u – kuchli beshlikda mavsum boshidan buyon yuz martadan ortiq muvaffaqiyatli aldab o‘tishlarni amalga oshirgan ilk futbolchiga aylandi. Taqqoslash uchun, bu boradagi ikkinchi o‘rinda turgan «Manchester Siti» vingeri Dokuda bu ko‘rsatkich 38 taga kamroq. Umuman olganda, Yamal o‘z darajasidagi ishlarni bajarib kelmoqda, o‘yinda yakuniy hisobni o‘rnatgan Bernal uchun esa bu kattalar futbolidagi ilk golga aylandi. Ushbu 18 yoshli yarimhimoyachi Fermin Lopesning pasidan keyin ikki himoyachidan qochib ketdi, raqibning bir futbolchisini fint bilan gazonga yotqizdi va yaqin burchakni aniq nishonga oldi.