Estoniya TIV rahbari: “Agar Rossiya bostirib kirsa, urushni RF hududiga ko‘chiramiz”

“Biz nima qilish kerakligini aniq bilamiz. Rossiyaning ehtimoliy bostirib kirishiga tayyormiz, va tiyib turish darajasi haqiqatan ham yuqori”, — dedi u.

Estoniya RFning ehtimoliy hujumida ilk nishonlardan biri hisoblanishi haqidagi savolga javob berar ekan, Tsaxkna “xaritaga qarasak, bu juda mantiqiy”, deb tan oldi. 

“Lekin haqiqiy hayotda biz o‘z imkoniyatlarimizni sezilarli darajada oshiryapmiz. Menimcha, NATO har qachongidan ham kuchliroq. Bizda allaqachon yangi mudofaa rejalari bor, bu esa biz shunchaki kutib turmayotganimizni anglatadi. Agar Rossiya bizning hududimizga bostirib kirsa, qarshilikni boshlagan holda, urushni Rossiya hududiga ko‘chiramiz”, — deb ogohlantirdi Estoniya TIV rahbari.

U shu kontekstda eng avvalo “siyosiy iroda” uni xavotirga solayotganini aytdi. “Bizni Yevropaning o‘zi xavotirga soladi: Yevropa qaror qabul qilishga, tik turishga, kuchayishga tayyormi-yo‘qmi”, — dedi vazir.

Estoniya tashqi ishlar vaziri Rossiya prezidenti Vladimir Putin bilan hech qanday rejasiz muzokara olib borishni xatolik, deb atadi. 

“Biz Yevropada bunday siyosatni o‘n yillab yuritdik. Natija nima bo‘ldi? Natija — yana ko‘proq urushlar, yanada agressiv Rossiya. Shuning uchun hozir Yevropa Ittifoqi uchun qandaydir maxsus vakil qidirishni boshlash, uni Kremlga yuborish mutlaqo noto‘g‘ri: u u yerdan xorlangan holda, yanada zaif bo‘lib qaytadi va Ukraina pozitsiyalarini ham zaiflashtiradi”, — deb hisoblaydi Tsaxkna.