Kunduzgi qarab turish xizmati: 1 martdan ayrim toifadagi bemorlar qamrab olinadi

2026 yil 1 martdan boshlab ruhiy kasallik bo‘yicha dispanser nazoratida turuvchi, xulq-atvori buzilishlari bo‘lmagan hamda demensiya, Parkinson yoki Alsgeymer kasalligi tashxisi qo‘yilgan maxsus parvarishga muhtoj shaxslar uchun kunduzgi qatnov asosida qarab turish xizmati yo‘lga qo‘yiladi.

Foto: Dreamstime

Vazirlar Mahkamasining 2026 yil 29 yanvardagi 36-son qarorida “Faol hayotga qadam” dasturi doirasida ijtimoiy xizmatlar tizimini takomillashtirishga qaratilgan bir qator o‘zgartirish va qo‘shimchalar nazarda tutilgan.

Qarorda belgilanishicha, 2026 yil 1 martdan mazkur toifadagi fuqarolarga kunduzgi qatnov asosida qarab turish xizmati ko‘rsatish amaliyoti yo‘lga qo‘yiladi.

Hujjatda aniq ta’kidlangan talablarga ko‘ra, xizmat quyidagi shartlarga javob beruvchi shaxslarga tatbiq etiladi:

ruhiy kasallik bo‘yicha dispanser nazoratida turishi;
xulq-atvori buzilishlari bo‘lmasligi;
demensiya, Parkinson yoki Alsgeymer kasalligi tashxisi qo‘yilgan bo‘lishi.

Qarorning o‘zi 2026 yil 2 fevraldan kuchga kirgani ko‘rsatilgan bo‘lib, kunduzgi qarab turish xizmati mexanizmi esa 1 martdan amalga joriy etilishi belgilangan.

Ma’lumot o‘rnida qayd etilishicha, hujjat “Faol hayotga qadam” dasturi joriy etilishi munosabati bilan qabul qilinib, ijtimoiy xizmatlar sohasida monitoring va xizmat ko‘rsatish jarayonlarini takomillashtirishga qaratilgan normalarni ham o‘z ichiga oladi.