Keniyaliklarni RF urushiga yollash: ayblanuvchi qo‘lga olindi

Keniyaning Moyale shahridagi (Efiopiya bilan chegara hududi) politsiya bo‘limi detektivlari odam savdosiga aloqadorlikda qidiruvda bo‘lgan 33 yoshli Festus Aras Omvambunni ushladi. Bu haqda 25 fevral, chorshanba kuni X ijtimoiy tarmog‘ida Keniya Jinoiy tergovlar boshqarmasi xabar berdi. AFP agentligi aniqlik kiritishicha, ushlangan shaxs Keniyadan erkaklarni Rossiyaga harbiy xizmatga yuborish ishidagi ehtimoliy asosiy figurant hisoblanadi.

Jinoiy guruh qurbonlarga Yevropa davlatlarida qonuniy ish topib berishni va’da qilgan, ammo oqibatda ular «qonuniy bo‘lmagan va xavfli ish»ni bajarishga majbur bo‘lgan — bu esa ularning qadr-qimmati va xavfsizligidan mahrum qilgan, deya bildirdi boshqarma.

Festus hozir politsiya hibsida, oldinda uni sud jarayoni kutib turibdi.

Reuters 19 fevral kuni Keniya razvedkasi ma’lumotlariga tayanib, 1000 nafardan ortiq keniyalik Rossiya tomonidan Ukrainadagi urushda qatnashish uchun yollanganini xabar qilgan. Bu — hukumat shu paytgacha taxmin qilganidan besh barobar ko‘p. Keniya parlamenti quyi palatasi — Milliy assambleyada ko‘pchilik yetakchisi Kimani Ichungva 18 fevral kuni razvedka hisobotini deputatlarga taqdim etgan.

Hisobotga ko‘ra, poraga og‘gan amaldorlar va odam savdosi bilan shug‘ullanuvchi shaxslar tarmog‘i rekrutlarni yollagan. Ular orasida sobiq harbiylar, politsiyachilar va ishsizlar ham bo‘lgan. Yollovchilar oyiga taxminan 2715 dollar (2308 yevro) maosh va 9309 dollargacha (7916 yevro) mukofot pullarini va’da qilgan.

Fevral oyi ma’lumotlariga ko‘ra, 89 keniyalik Ukraina frontida bo‘lgan, 39 nafari kasalxonalarda davolangan, 28 nafari bedarak yo‘qolgan deb hisoblangan.

Hisobotda aytilishicha, keniyaliklar avval Turkiya yoki BAA orqali turistik vizalar bilan mamlakatni tark etgan. Keyinroq Nayrobi aeroportida nazorat kuchaytirilgandan so‘ng, rekrutlar Uganda, Janubiy Afrika va Kongo Demokratik Respublikasi orqali chiqib ketishga o‘tgan. Reuters qayd etishicha, ishga yollash agentliklari aeroport xodimlari, immigratsiya xizmatlari, shuningdek Rossiya elchixonasi (Nayrobi) va Keniyaning Moskvadagi diplomatik vakolatxonasidagi ayrim xodimlar bilan pora asosida hamkorlik qilgan bo‘lishi mumkin.

Nayrobidagi diplomatik missiya Rossiyaning noqonuniy yollashga aloqadorligini rad etgan. U yerda «chet elliklar RF Qurolli kuchlari safiga ixtiyoriy ravishda qo‘shilishi mumkin», degan bayonot berilgan.

Ukraina tomoni 25 fevral kuni ma’lum qilishicha, RF Qurolli kuchlarida Afrikaning 36 mamlakatidan bo‘lgan 1780 nafardan ortiq shaxs aniqlangan. Ularning ayrimlari asirga tushgan.