Kiyev Eron, RF va Rossiya paralimpiyachilariga qarshi sanksiyalar kiritdi

Ukraina Rossiyaning harbiy-sanoat majmuasiga xizmat qilayotgan Rossiya va Eron kompaniyalari hamda fuqarolariga, shuningdek, Rossiyaning tajovuzini oqlayotgan rossiyalik paralimpiyachilarga qarshi yangi sanksiyalar joriy qildi. Ukraina prezidenti Volodimir Zelenskiy Milliy xavfsizlik va mudofaa kengashi (MXMK)ning tegishli qarorlarini o‘z farmonlari bilan kuchga kiritdi. Bu haqda 15 mart, yakshanba kuni uning ofisi xabar berdi.

Sanksiya ro‘yxatiga Ukraina harbiy-sanoat majmuasi bilan bog‘laydigan 130 nafar jismoniy va 48 nafar yuridik shaxs kiritildi. Ular orasida Rossiya dronlari, qanotli va ballistik raketalari, boshqariladigan o‘q-dorilari hamda samolyotlarida qo‘llanadigan “Kometa” seriyasidagi sun’iy yo‘ldosh navigatsiya uskunalari ishlab chiqarish uchun butlovchi qismlar yetkazib berishga aloqador kompaniyalar ham bor. Cheklov choralari, shuningdek, “Oreshnik” raketa majmuasi ishlab chiqarishida ishtirok etayotgan korxonalarga ham nisbatan qo‘llandi.

Bundan tashqari, ro‘yxatga Eron dronlari va raketalarini ishlab chiqarish bilan bog‘liq kompaniyalar va fuqarolar, shuningdek, Rossiya hududida Shahed dronlarini ishlab chiqarishni yo‘lga qo‘yish va kengaytirishga yordam bergan shaxslar ham kiritildi. Kiyev ma’lumotlariga ko‘ra, ushbu dronlar bilan Ukraina shaharlari va energetika obektlariga hujum qilgan Rossiya operatorlarini tayyorlagan eronlik instruktorlar ham sanksiyalar ostiga olingan.

Prezidentning sanksiya siyosati masalalari bo‘yicha vakili Vladislav Vlasyuk Rossiya va Eron harbiy-sanoat majmualari allaqachon o‘zaro uzviy bog‘lanib ketganini ta’kidladi.

“Ushbu sanksiya paketi bilan biz Ukrainaga qarshi Rossiya va ko‘plab mamlakatlarga qarshi Eron hujumlarida qo‘llanayotgan zarba vositalarini ishlab chiqarishga jalb etilgan asosiy ishtirokchilarni ko‘rsatmoqdamiz. Dunyo bu ta’minot zanjirlarini, jumladan, muhim butlovchi qismlar yetkazib berish yo‘llarini uzish va bu hamkorlikka samarali qarshi turish uchun ancha ko‘proq ish qilishi kerak”, — dedi u.

Cheklov choralari joriy etilgan rossiyalik paralimpiyachilar Rossiyaning Ukrainaga qarshi urushida ishtirok etgan, Rossiya targ‘ibotini tarqatgan va sport tadbirlaridan Rossiya jinoyatlari hamda bosib olish siyosatini oqlash maydoni sifatida foydalangan, deyiladi Zelenskiy ofisi saytida.

Ro‘yxatga quyidagilar kiritilgan: Nikolay Bondarenko, Anton Bushmakin, Rinat Vasilev, Tsiden Geninov, Denis Ishbulatov, Rostislav Kostenko, Rustam Sayfullin, Ruslan Ustyujin, Vladislav Shinkar, Ivan Shiryayev.