Shavkat Mirziyoyev: qishloq va mahallalarga Yangi O‘zbekiston ruhi kirib bormoqda

Davlat rahbari qayd etganidek, mamlakatning barcha hududlarida, ayniqsa, qishloq va mahallalarda keng ko‘lamli yangilanish jarayonlari amalga oshirilmoqda. Bu esa Yangi O‘zbekiston g‘oyasi amalda har bir hududga kirib borayotganining yaqqol ifodasi sifatida baholanmoqda.

Prezident so‘zlariga ko‘ra, yangi ish o‘rinlari yaratish, kambag‘allikni qisqartirish va ijtimoiy himoyani kuchaytirish borasida ulkan qadamlar tashlanmoqda. Shu bilan birga, zamonaviy korxonalar, kommunikatsiya tarmoqlari, shinam uy-joylar, ta’lim, tibbiyot, madaniyat va sport obektlari barpo etilmoqda.

Shavkat Mirziyoyev kelgusida bunday qurilishlar va obodonlashtirish ishlari ko‘lami yanada kengaytirilishini alohida ta’kidladi.

Davlat rahbari ushbu qutlug‘ ayyomda mirishkor dehqon va fermerlarga ham alohida hurmat va ehtirom bildirdi. Ularning xalq dasturxonini to‘kin va farovon qilish yo‘lidagi fidokorona mehnati yuksak baholandi.

“Chunki sizlarning oliyjanob mehnatingiz bilan xalqimizning rizq-u nasibasi butun bo‘ladi. Bu borada davlatimiz, jamiyatimiz sizlarni doimo qo‘llab-quvvatlaydi”, dedi prezident.

Ta’kidlanganidek, Yangi O‘zbekistonni barpo etish yo‘lidagi islohotlar markazdan eng olis qishloq va mahallalargacha yetib borib, aholi hayotida real o‘zgarishlar yaratishga xizmat qilmoqda.