AQSh va Isroilning Eronga qarshi urushi: qancha odam halok bo‘ldi?

Amerika vaqti bilan 7 aprel kuni AQSh va Eron 2 haftalik sulhga kelishdi. Reuters nashri qariyb 40 kunlik urush davomida Yaqin Sharq bo‘ylab xabar qilingan qurbonlar soni haqidagi so‘nggi ma’lumotlarni jamladi. Qayd etish lozimki, mojarolar davrida hukumatlar va turli guruhlar taqdim qilgan ma’lumotlarni mustaqil ravishda tasdiqlash imkonsiz.

Eron

AQShda joylashgan HRANA huquqni muhofaza qilish guruhi urush boshlanganidan beri Eronda 3 636 kishi halok bo‘lganini ma’lum qildi. Qayd etilishicha, ulardan 1 701 nafari tinch aholi, jumladan, kamida 254 nafari bolalardir.

Guruhning bildirishicha, ma’lumotlar joylardagi hisobotlar, mahalliy aloqalar, tibbiy va favqulodda yordam manbalari, fuqarolik jamiyati tarmoqlari, ochiq manbalar va rasmiy bayonotlardan olingan.

Xalqaro Qizil Xoch va Qizil yarim oy jamiyatlari federatsiyasi esa AQSh va Isroilning Eronga bergan zarbalari natijasida hozirgacha kamida 1 900 kishi halok bo‘lgani, 20 000 kishi jarohatlanganini ma’lum qildi.

Ushbu raqamlarga 4 mart kuni Shri-Lanka yaqinida AQSh hujumi oqibatida Eron kemasida halok bo‘lgan 104 nafar harbiy kiritilganmi yoki yo‘qmi, hozircha aniq emas.

Livan

Livan rasmiylarining ma’lum qilishicha, 2 martdan buyon Isroil zarbalari oqibatida 1 530 kishi, jumladan, kamida 129 nafar bola halok bo‘lgan.

Shuningdek, Isroil bilan yangi urush boshlaganidan beri «Hizbulloh»ning 400 dan ortiq jangchisi halok bo‘ldi, deb ma’lum qildi guruh hisob-kitobidan xabardor ikki manba Reutersʼga. Rasmiylar xabar qilgan 1,5 ming kishilik qurbonlar soniga ushbu jangchilar kiritilganmi yoki yo‘qmi, noma’lum.

Bundan tashqari, Isroilning zarbalari oqibatida Livan armiyasining kamida 10 nafar askari ham halok bo‘lgan. Talafotlarning aksariyati Livan janubida qayd etilgan.

Shu bilan birga, Livan janubidagi ikki alohida hodisada BMTning Indoneziyadan bo‘lgan 3 nafar tinchlikparvar xodimi halok bo‘ldi: biri yo‘l chetidagi portlashdan, ikkinchisi esa snaryad tegishi natijasida.

Iroq

Iroq sog‘liqni saqlash idoralari ma’lumotlariga ko‘ra, inqiroz boshlanganidan beri kamida 117 kishi halok bo‘lgan. Ular orasida tinch aholi vakillari, Eronga aloqador shia xalq ko‘ngilli kuchlari a’zolari, AQSh ittifoqchisi bo‘lgan kurd jangchilari, politsiya va armiya xodimlari bor.

Iroq port xavfsizligi rasmiylariga ko‘ra, tankerlarga qilingan hujum natijasida xorijiy ekipajning bir nafar a’zosi ham halok bo‘lgan.

Isroil

AQSh bilan Eronga qarshi urush boshlagan Isroil ham yo‘qotishlarga uchramoqda. Xususan, Isroil tez yordam xizmati ma’lumotlariga ko‘ra, Eron va Livandan javob tariqasida uchirilgan raketalar oqibatida Isroilda 23 kishi halok bo‘ldi. Shuningdek, Livan janubida Isroilning 11 nafar askari ham o‘ldirildi.

Bundan tashqari, 22 mart kuni Isroil kuchlari xato o‘q uzishi natijasida Livan bilan chegara yaqinida bir nafar isroillik fermer halok bo‘ldi.

Amerika Qo‘shma Shtatlari

39 kunlik urush davomida AQSh Markaziy qo‘mondonligi 13 nafar harbiy xizmatchi halok bo‘lganini va 300 dan ortig‘i yaralanganini ma’lum qildi.

AQSh harbiylarining bildirishicha, Iroq uzra AQSh harbiy yonilg‘i quyish samolyoti halokatga uchrashi oqibatida olti kishi o‘lgani tasdiqlangan. Yana yetti kishi Eronga qarshi operatsiyalar davomida janglarda halok bo‘lgan.

Birlashgan Arab Amirliklari

BAA rasmiylariga ko‘ra, Eron hujumlari oqibatida 12 kishi halok bo‘lgan, jumladan, ikki nafar harbiy xizmatchi ham. Oxirgi o‘lim holati tutib qolingan raketa qoldiqlari Abu-Dabining Habshan gaz inshootlariga tushishi tufayli sodir bo‘ldi.

Qatar

Qatar Mudofaa vazirligiga ko‘ra, 22 mart kuni Qatar hududiy suvlarida «muntazam xizmat» vaqtida yuz bergan texnik nosozlik natijasida vertolyot halokatga uchrab, yetti kishi halok bo‘lgan. Boshqa tafsilotlar berilmadi.

Halok bo‘lganlarning to‘rt nafari Qatar qurolli kuchlari xodimi, biri Qatar–Turkiya qo‘shma kuchlarining turkiyalik harbiy xizmatchisi. Shuningdek, yana ikki kishi Turkiyaning Aselsan mudofaa kompaniyasi texnik xodimlari bo‘lgan.

Kuvayt

Amirlik mojaro davomida 7 kishi halok bo‘lganini xabar qildi. Jumladan, Eron hujumlarida o‘lgan uch fuqaro, ichki ishlar vazirligining ikki xodimi va ikki nafar askar.

Falastin – G‘arbiy sohil

Isroil tomonidan bosib olingan G‘arbiy sohilda Eron raketalari qulashi natijasida to‘rt nafar falastinlik ayol halok bo‘ldi.

Suriya

So‘nggi yillarda Yaqin Sharqdagi eng qaynoq nuqta bo‘lgan Suriya bu safar urushga aralashishdan tiyilmoqda. SANA davlat axborot agentligiga ko‘ra, urushning ilk kuni – 28 fevralda Eron raketasi janubdagi Suveyda shahridagi binoga tushgan. Natijada to‘rt kishi halok bo‘ldi.

Bahrayn

Bahrayn ichki ishlar vazirligi ma’lumotlariga ko‘ra, Eronning alohida hujumlarida ikki kishi halok bo‘lgan. Ulardan oxirgisi poytaxt Manamadagi turar joy binosiga zarba berilganida sodir bo‘lgan.

Bundan tashqari, BAA Mudofaa vazirligi 24 mart kuni Bahrayndagi fuqarolik pudratchilaridan biri Eron hujumi oqibatida halok bo‘lganini ma’lum qildi. Pudratchi Marokash fuqarosi bo‘lgan.

Ummon

AQSh va Eron o‘rtasidagi vositachilik muzokaralariga mezbonlik qilayotgan Ummonning Soxar provinsiyasidagi sanoat zonasiga 13 mart kuni Eron droni kelib tushdi. Natijada ikki kishi halok bo‘lgani xabar qilindi. Avvalroq Maskat qirg‘oqlari yaqinida tankerga snaryad tegishi oqibatida bir kishi halok bo‘lgandi.

Saudiya Arabistoni

Eron Saudiya bo‘ylab o‘nlab raketa va dronlar uchirdi. Iqtisodiy zarar katta bo‘lsa-da, qurbonlar soni ko‘p bo‘lmadi. Xususan, Ar-Riyoddan janubi-sharqda joylashgan Al-Xarjdagi turar joy binosiga snaryad tushishi oqibatida ikki kishi halok bo‘ldi.

Fransiya

Iroq shimolidagi fransuz askarlari aksilterror tayyorgarligini o‘tayotgan bazaga dron hujumi uyushtirilishi oqibatida bir nafar askar halok bo‘ldi. Shuningdek olti nafar harbiy yaralandi.