Trampning yaqin ittifoqchisi Milliy razvedkaga rahbarlik qiladi

AQSh prezidenti Donald Tramp Milliy razvedka direktori lavozimidan ketgan Tulsi Gabbard o‘rniga vaqtincha rahbar sifatida 38 yoshli tadbirkor Bill Pulteni tayinladi.

Trampning ta’kidlashicha, Pulte moliyaviy bozorlar barqarorligini ta’minlash va Fannie Mae hamda Freddie Mac ipoteka agentliklarida trillionlab dollarlik aktivlarni boshqarish bo‘yicha katta tajribaga ega.

Shu bilan birga, Bill Pulte maxsus xizmatlar yoki razvedka sohasida ishlagan emas. U AQShning 18 ta razvedka idorasi faoliyatini doimiy rahbar tayinlangunga qadar muvofiqlashtirib boradi.

Pulte hozirgi lavozimlarini ham saqlab qoladi. Tramp Oq uyga qaytgach, u Federal uy-joy moliyalashtirish agentligi (FHFA) rahbari etib tayinlangan edi. Shuningdek, u davlat ipoteka tashkilotlari — Fannie Mae va Freddie Macʼga ham rahbarlik qilib kelmoqda.

Ayrim Amerika ommaviy axborot vositalari Pulteni Trampning «hujumkor himoyachisi» deb atamoqda. U bir necha bor Trampning siyosiy raqiblarini ommaviy tanqid qilib chiqqan.

Avvalroq Milliy razvedka direktori lavozimida ishlagan Tulsi Gabbard 22 may kuni iste’fo berish haqida ariza yozgan. U qarorini turmush o‘rtog‘ining sog‘lig‘i bilan bog‘liq sabablar bilan izohlagan.

Biroq Amerika va Britaniya nashrlari ma’lumotlariga ko‘ra, Gabbardning AQSh ma’muriyatining Yaqin Sharq siyosati, xususan Eron masalasidagi qarashlari Oq uy pozitsiyasi bilan to‘liq mos kelmagan.