Олий Мажлис Сенати раиси Танзила Норбоева давлат ва жамият бошқаруви соҳасидаги кўп йиллик самарали меҳнати, Янги Ўзбекистонда парламент фаолиятини ривожлантириш ва демократик ислоҳотларни изчил амалга оширишдаги алоҳида хизматлари учун “Эл-юрт ҳурмати” ордени билан мукофотланди.
Президент фармонида Танзила Норбоеванинг жонкуяр ташкилотчи ва ташаббускор раҳбар сифатидаги бой билим ва тажрибаси, ватанпарварлик фазилатлари билан миллий давлатчиликнинг ҳуқуқий асосларини мустаҳкамлаш, инсон қадрини улуғлаш, аёлларнинг ўрни ва нуфузини юксалтиришга қаратилган устувор вазифалар ижросини таъминлашга катта ҳисса қўшиб, халқ орасида муносиб обрў-эътибор қозониб келаётгани қайд этилган.
Шунингдек, унинг ёш авлодни ватанга муҳаббат ва садоқат, миллий ва умуминсоний қадриятларга ҳурмат руҳида тарбиялаш йўлидаги ибратли фаолияти, ижтимоий-сиёсий ҳаётдаги фаол иштироки эътироф этилган.
Танзила Норбоева Олий Мажлис Сенатининг 2019 йил июндаги йигирманчи ялпи мажлисида Сенат раиси лавозимига сайланган.
