28 iyul kuni o‘tkazilgan tantanali marosimda prezident Shavkat Mirziyoyev diplomatik vakolatxonalar rahbarlarini Yangi O‘zbekistondagi faoliyati boshlangani bilan tabriklab, bugungi murakkab geosiyosiy sharoitda diplomatlarning mas’uliyati har qachongidan ham muhim ekanini ta’kidladi.
Davlat rahbari har bir elchiga murojaat qilib, ular vakillik qilayotgan mamlakatlar bilan hamkorlikni yanada rivojlantirish bo‘yicha ustuvor vazifalarga to‘xtaldi. Xususan, Italiya bilan “yashil” energetika va ta’lim, Saudiya Arabistoni bilan 25 milliard dollarlik loyihalar portfeli, Kuvayt bilan investitsiya va infratuzilma, Jazoir bilan neft-gaz va qishloq xo‘jaligi, Malayziya bilan yarim o‘tkazgichlar va islom moliyasi, Pokiston bilan Transafg‘on transport yo‘lagi, Ozarboyjon bilan investitsiya portfelini 10 milliard dollarga yetkazish hamda Qozog‘iston bilan o‘zaro savdo hajmini 10 milliard dollarga olib chiqish bo‘yicha rejalar alohida qayd etildi.
Marosim yakunida prezident yangi tayinlangan elchilarga diplomatik faoliyatida muvaffaqiyat tilab, ularni O‘zbekiston hududlari va xususiy sektor bilan faol hamkorlik qilishga chaqirdi. Elchilar esa mamlakat bilan ko‘p qirrali hamkorlikni yanada rivojlantirish uchun bor imkoniyatlarini safarbar etishini bildirdi.
