Rossiya qamoqxonalari va koloniyalaridagi mahbuslar huquqlarini himoya qilish bilan shug‘ullanuvchi Gulagu.net loyihasi asoschisi Vladimir Osechkin tashkilot faoliyatini nima sababdan muzlatishga qaror qilganini ma’lum qildi. U bu haqda Germaniyaning n-tv telekanaliga bergan intervyusida so‘zlab bergan.
Osechkinning ta’kidlashicha, inson huquqlari himoyachilari, qiynoqlar, zo‘ravonlik va urushga qarshi kurashayotgan faollar hozirda chuqur global inqirozni boshdan kechirmoqda.
«Biz - va biz bilan birga qiynoqlar, zo‘ravonlik va urushga qarshi chiqqan barcha insonlar global inqiroz holatidamiz. Juda ko‘p hamkasblarim jim. Bu sukut nafaqat bizning missiyamizga, balki butun dunyoga ham zarar yetkazmoqda», - dedi u.
Uning fikricha, bugungi kunda xalqaro huquq tizimi inqirozga yuz tutgan, inson huquqlari esa xalqaro siyosiy kun tartibida ikkinchi darajaga tushib qolgan. Osechkin ommaviy axborot vositalari ko‘proq mashhur shaxslar va siyosiy shov-shuvlarga e’tibor qaratayotganini, odamlarning har kunlik o‘limi esa odatiy holga aylanib qolganini ta’kidladi.
Huquq himoyachisi Gulagu.net ko‘p yillik faoliyati davomida birorta ham inson huquqlari sohasidagi xalqaro mukofotga sazovor bo‘lmaganini aytdi. Uning fikricha, ayrim hollarda jamoatchilik ko‘proq omma oldida chiroyli nutq so‘zlaydigan shaxslarga e’tibor qaratadi, amalda inson huquqlari buzilishini hujjatlashtirish bilan shug‘ullanuvchilar esa yetarlicha qo‘llab-quvvatlanmaydi.
Osechkin o‘z hayoti haqida ham gapirib, 2007–2010 yillarda Rossiyada tergov izolyatorida saqlanganini esladi.
«Men qamoqdan sochsiz va tishlarimsiz chiqqanman», - dedi u.
Huquq himoyachisining aytishicha, Fransiyaga ko‘chib o‘tganiga qaramay, u hamon o‘z xavfsizligidan xavotirda. Osechkinning ma’lum qilishicha, 2025 yil oktyabr oyida uni o‘ldirishni rejalashtirgan to‘rt nafar gumonlanuvchi qo‘lga olingan. 2026 yil may oyida esa uning uyi yaqinida yana bir gumonlanuvchi ushlangan. Bu ishlar yuzasidan Fransiyaning terrorizmga qarshi prokuraturasi tergov olib bormoqda.
Osechkin oila a’zolarining bir qismi va loyiha jamoasi politsiya qo‘riqlovi ostida ekanini ham ma’lum qildi. Uning aytishicha, tahlilchilar uni marhum siyosatchi Aleksey Navalniydan keyin Rossiya maxsus xizmatlarining asosiy nishonlaridan biri deb hisoblamoqda. Bunga Gulagu.net tomonidan ehtimoliy harbiy jinoyatlar hujjatlashtirilgani va muhim guvohlarni xorijga olib chiqilgani sabab sifatida ko‘rsatilmoqda.
Osechkin, shuningdek, Rossiyada kuzda yana bir safarbarlik to‘lqini boshlanishi ehtimoli yuqori deb hisoblashini aytdi. Uning so‘zlariga ko‘ra, 2022 yildan buyon qabul qilingan qonunlar hokimiyatga fuqarolarning pasportlarini bekor qilish, haydovchilik guvohnomalarini bloklash, bank hisoblari va mol-mulkini musodara qilish imkonini beradi.
Huquq himoyachisi, shu bilan birga, AQShga kirish imkoniyatlari cheklangani, Yevropa davlatlari esa migratsiya siyosatini kuchaytirib, vizalarni olish ham ancha qiyinlashganini ta’kidladi.
Vladimir Osechkin 2015 yildan buyon Fransiyada yashab keladi. Uning ta’kidlashicha, Rossiya Federal xavfsizlik xizmatiga Gulagu.net ma’lumotlar bazasiga kirish imkonini berishdan bosh tortganidan so‘ng mamlakatni tark etishga majbur bo‘lgan. Keyingi yillarda Rossiyada unga qarshi bir nechta jinoyat ishlari qo‘zg‘atilgan, 2025 yilda esa u Rossiya Qurolli kuchlari haqida «feyk» ma’lumot tarqatish aybi bilan sirtdan sakkiz yilga ozodlikdan mahrum qilish jazosiga hukm qilingan.
