Bu haqda Bloomberg 26-avgust kuni Kremlga yaqin manbalariga tayanib xabar berdi.
Agentlik suhbatdoshlarining aytishicha, Moskva ayni paytda Kiyevga, jumladan, shaharning markaziy hududlariga yadroviy kallak bilan jihozlanmagan ballistik raketalar orqali yanada faol zarbalar berish imkoniyatlarini oʻrganmoqda.
Rossiya qoʻshinlarining boshqa ehtimoliy nishonlari sifatida Ukraina shaharlaridagi infratuzilma obyektlari ham koʻrib chiqilayotgani aytilgan.
Manbalar fikricha, Rossiya iqtisodiyotiga nisbatan sanksiyalar bosimining kuchayishi, shuningdek, Ukrainaning Rossiya neftni qayta ishlash zavodlari va logistika markazlariga hujumlari Rossiya prezidenti Vladimir Putinni urushni tugatishga majbur qilmaydi.
Bloomberg manbalariga koʻra, Moskva Ukraina zarbalarini tobora koʻproq NATO davlatlarining hujumlari sifatida qabul qilmoqda. Bunga alyans aʼzolari Kiyevni qurol-yarogʻ va razvedka maʼlumotlari bilan taʼminlayotgani sabab qilib koʻrsatilgan.
«Harbiy harakatlarning hozirgi shakli hali eskalatsiyaning eng yuqori nuqtasi emas», deya agentlik oʻz manbalarining fikrini keltirgan.
25-avgust kuni AQSH Markaziy razvedka boshqarmasi - MRB direktori Jon Retkliff Moskvaga tashrif buyurgan. Uning Rossiya tomoni bilan muzokaralarida muhokama qilingan asosiy masalalar hozircha ochiqlanmagan.
Bloomberg eslatishicha, sakkiz oylik tanaffusdan keyin AQSH prezidentining maxsus vakili Stiv Uitkoff va Donald Trampning kuyovi Jared Kushner yana Moskvaga borishi, shuningdek, ilk bor Kiyevga tashrif buyurishi mumkinligi kutilgan. Biroq bu tashriflarning sanasi hozircha eʼlon qilinmagan.
Kremlga yaqin toʻrt manbaning agentlikka aytishicha, diplomatik saʼy-harakatlarda sezilarli natija boʻlmayotgani sababli Moskva oʻz maqsadlariga erishish vositasi sifatida keyingi eskalatsiyaga muqobil yoʻl koʻrmayapti.
Rossiya tomoni Uitkoff va Kushner Moskvaga tinchlik shartlari boʻyicha yangi takliflar olib kelishidan umid qilmoqda. Biroq manbalar muzokaralarda jiddiy burilish yuz berishiga umid juda past ekanini bildirgan.
Ularning taʼkidlashicha, Moskva nuqtai nazaridan Rossiya allaqachon bir qator murosalarga borgan va keyingi har qanday yon berish uning muzokaralardagi pozitsiyasini zaiflashtiradi. Rossiyada Putin va Trampning Ankorijdagi uchrashuvi natijasi ham amalga oshmagan murosalardan biri sifatida baholanayotgani aytilgan.
