Oʻzbekiston Much Better Adventures xalqaro turistik platformasining Solo Travel Index 2026 reytingida mustaqil sayohatchilar uchun eng yaxshi beshta yoʻnalish qatoridan oʻrin oldi. Bu haqda “Dunyo” axborot agentligi Kyiv Diplomatic jurnaliga tayanib xabar berdi.
Reytingni tuzishda mutaxassislar 26 ta mamlakatni bir qator mezonlar boʻyicha baholagan. Ular orasida turlarni bron qilish tendensiyalari, sayyohlarning sharhlari, xavfsizlik darajasi, viza tartibi va ovqatlanish xarajatlari bor.
Natijada Oʻzbekiston Italiya, Yaponiya va Portugaliya kabi mashhur turistik davlatlar bilan bir qatordan joy olgan.
Reyting mualliflari AQSH fuqarolari uchun 30 kunlik vizasiz rejim joriy etilganidan keyin amerikalik sayyohlarning Oʻzbekistonga qiziqishi ortganini ham qayd etgan.
Mamlakatning asosiy turistik ustunliklari sifatida boy tarixiy va madaniy meros, rang-barang tabiat hamda rivojlanayotgan sayyohlik infratuzilmasi koʻrsatilgan.
Xususan, yolgʻiz sayohat qiluvchilarga Nurota togʻlaridagi piyoda yoʻnalishlar boʻylab sayohat qilish, anʼanaviy oʻtovlarda tunab qolish, Qizilqum choʻli orqali Aydarkoʻlga borish tavsiya etilgan.
Shuningdek, Buyuk ipak yoʻli tarixi bilan bogʻliq Samarqand, Buxoro va boshqa qadimiy shaharlarning meʼmoriy va madaniy merosi alohida eʼtirof etilgan.
Oʻzbekiston sayohat xarajatlarining nisbatan hamyonbopligi bilan ham ajralib turadi. Mamlakat avvalroq Condé Nast Traveler talqini boʻyicha eng arzon turistik yoʻnalishlar roʻyxatiga ham kiritilgan edi.
