Bosh prokuratura huzuridagi Departamentning Oltinkoʻl tumani boʻlimi va boshqa huquqni muhofaza qiluvchi organlar xodimlari hamkorligida tezkor tadbir oʻtkazildi.
Unda fuqaro M.A. boshqa bir fuqaro Q.M.ga uning savdo doʻkonida elektr energiyasidan noqonuniy foydalanish holati boʻyicha yuzaga kelgan 400 mln soʻmlik qarzdorlikni kamaytirib berishni vaʼda qilgan.
M.A. bu masalani «Hududiy elektr tarmoqlari» AJ Andijon viloyati filialida ishlovchi tanishlari orqali hal qilib berishini aytgan. Buning evaziga u 3 ming AQSH dollari talab qilgan.
Tezkor tadbir davomida M.A. 3 ming dollarni olayotgan vaqtda ashyoviy dalillar bilan ushlangan.
Holat yuzasidan Jinoyat kodeksining 168-moddasi (firibgarlik) hamda 28, 211-moddalari (pora berish) bilan jinoyat ishi qoʻzgʻatilgan. Hozirda tergov harakatlari olib borilmoqda.
