17-sentabr kuni Samarqandda Butunjahon shaxmat Olimpiadasining 2-tur bahslari oʻtkazildi.
Oʻzbekistonning asosiy erkaklar terma jamoasi yana zafar quchib, Peru ustidan 3,5:0,5 hisobida gʻalaba qozondi.
Birinchi taxtada Nodirbek Abdusattorov Peruning eng kuchli shaxmatchisi Xorxe Korini magʻlub etdi. Javohir Sindarov oq donalar bilan oʻynab, Diyego Saul Kilyasni yengdi. Shamsiddin Vohidov Stiven Roxasni magʻlubiyatga uchratdi. Muhiddin Madaminov esa Fernando Fernandes bilan durang oʻynadi.
Musobaqada favorit sanalayotgan AQSH terma jamoasi ikkinchi turda Moʻgʻulistonni 2,5:1,5 hisobida qiyinchilik bilan magʻlub etdi. Hindiston xuddi shunday hisobda Indoneziya shaxmatchilarini dogʻda qoldirdi. Xitoy shaxmatchilari Chilini 3:1 hisobida yengdi.
Oʻzbekiston-2 terma jamoasi Jazoirni 4:0 hisobida tor-mor etdi. Jahongir Vohidov, Muhammadzohid Suyarov, Ortiq Nigmatov va Humoyun Begmuratov ushbu gʻalabaga hissa qoʻshdi.
Oʻzbekiston-3 terma jamoasi Germaniyaga 0,5:3,5 hisobida imkoniyatni boy berdi.
Oʻzbekiston ayollar terma jamoasi Ekvadorni 4:0 hisobida tor-mor etdi.
Nilufarxon Imomqoʻziyeva, Gulruhbegim Tohirjonova, Guldona Karimova va Umida Omonova raqiblariga imkoniyat qoldirmadi.
Oʻzbekiston shaxmat federatsiyasi
Gulruhbegim Tohirjonova
Oʻzbekiston-2 ayollar jamoasi Iordaniyani 3,5:0,5 hisobida ishonchli tarzda magʻlub etdi. Oʻzbekiston-3 ayollar jamoasi Ispaniyaga 1,5:2,5 hisobida imkoniyatni boy berdi.
3-tur oʻyinlari 18-sentabr kuni oʻtkaziladi.
46-Butunjahon shaxmat olimpiadasi Samarqandda 27-sentabrgacha davom etadi.
