“Dunyo shaxmat osmonida yorqin yulduz boʻlib porlagan siz, aziz farzandlarimni 46-Jahon shaxmat olimpiadasida erishgan tarixiy gʻalabangiz bilan chin qalbimdan tabriklayman.
Ikki karra olimpiada chempioni degan yuksak sharafli unvon, buyuk zafar barchamizga, koʻpmillatli xalqimizga muborak boʻlsin!
Mana shu gʻoyat hayajonli onlarda 200 dan ziyod mamlakatdan 2 mingga yaqin eng kuchli va mashhur grossmeysterlar, nomdor jamoalar ishtirok etgan murosasiz bellashuvlarda koʻrsatgan aql-zakovatingiz, yuksak irodangiz, mahorat va jasoratingiz uchun butun el-yurtimiz, dunyo shaxmat jamoatchiligi sizlarga tasannolar aytmoqda.
Sizlar – Yangi Oʻzbekiston qahramonlari, jahon shaxmat olamida yangi tarix yaratgan oltin avlodsiz. Butun xalqimiz sizlar bilan cheksiz faxrlanadi, gʻururlanadi”, deyiladi tabrikda.
Prezident tabrigida Oʻzbekiston shaxmatchilari amaldagi Olimpiada chempioni – Hindiston, qadimiy shaxmat maktabi va koʻplab grossmeysterlarga ega boʻlgan Xitoy, dunyo reytingida birinchi oʻrinni egallab kelayotgan, olti karra Olimpiada chempioni boʻlgan AQSH jamoalaridan ustun kelgani eʼtirof etilgan.
Samarqand olimpiadasida Oʻzbekiston parashaxmatchilari bunday oʻyinlar tarixida birinchi marta bronza medalini qoʻlga kiritishgani ham alohida taʼkidlangan.
“El-yurtimiz barcha shaxmatchilarimiz timsolida kuchli bilim va iroda sohiblarini, katta-katta marralarni zabt etishga qodir boʻlgan Yangi Oʻzbekiston yoshlarini koʻradi.
Hech shubhasiz, bu yuksak gʻalaba barchamizga yangi kuch-gʻayrat, ruh va ilhom bagʻishlaydi, yosh avlodimiz uchun chinakam ibrat namunasi boʻlib xizmat qiladi.
Mamlakatimizda shaxmat rivojiga berilayotgan doimiy eʼtibor, yoʻlga qoʻyilgan samarali tizim va qulay sharoitlar sizlar erishgan natijalarni taʼminlashda muhim omil boʻldi. Yaqinda bu borada yana bir Prezident qarorini qabul qildik. Ushbu hujjat yaqin kelajakda yanada ulkan natijalar uchun, albatta, mustahkam zamin yaratadi.
Barchamizning umumiy gʻalabamiz uch ming yillik boy tarix va madaniyat ovozi kelib turgan, XIV-XV asrlarda Ikkinchi Renessans markazlaridan biri boʻlgan bu buyuk shaharda qoʻlga kiritilgani uning qadr-qimmatini yanada oshirmoqda”, deyiladi tabrikda.
Shuningdek, prezident oʻz tabrigida shu yil noyabr oyida jahon toji uchun boʻladigan bellashuvda Javohir Sindorovning gʻalaba qozonishiga umid va ishonch bildirgan.
