DW nashri Politico’ga tayanib xabar berishicha, bu haqda Ukraina prezidenti Volodimir Zelenskiyning 14-oktabr kuni Londonga tashrifi davomida maʼlum qilingan.
Raketalarni yetkazib berish uchun 1,6 milliard funt sterling, yaʼni qariyb 1,89 milliard yevro ajratilishi nazarda tutilgan. Gap yangi buyurtma emas, avval kelishilgan yordam paketini tezroq yetkazish haqida bormoqda.
Nashrga koʻra, LMM raketalari Ukraina Qurolli kuchlariga Rossiya Ukraina shaharlariga yoʻllayotgan reaktiv dronlarni urib tushirishda yordam beradi.
Buyuk Britaniya bosh vaziri Endi Byornem mamlakat Ukraina armiyasi uchun yangi harbiy yechimlarni ishlab chiqishda davom etishini bildirgan. Jumladan, Britaniya texnologiyalarini boshqa ittifoqchilar Ukrainaga bergan qurollarga moslashtirish rejalashtirilmoqda.
London, shuningdek, havo hujumidan mudofaa tizimlari uchun 45 million funt sterlinglik - 53,2 million yevrolik raketalar paketini eʼlon qilgan. Politico maʼlumotiga koʻra, Britaniya hukumati qoʻshimcha moliyaviy va harbiy yordam paketlari hamda Rossiyaga qarshi yangi sanksiyalarni tayyorlamoqda.
Bundan tashqari, Chernobil atom elektr stansiyasidagi himoya inshootini taʼmirlash uchun 17 million funt sterling - qariyb 20 million yevro ajratiladi. Inshoot 2025-yilda Rossiya droni hujumi oqibatida shikastlangan.
Britaniya hukumati zarur taʼmirlash ishlari bajarilmasa, korroziya koʻp yillik xalqaro sarmoyalar natijasiga putur yetkazishi va atrof-muhit uchun uzoq muddatli xavflar tugʻdirishi mumkinligini taʼkidlagan.
Zelenskiyning Londonga tashrifi Kiyev va Vashington munosabatlaridagi taranglik fonida oʻtgan. Avvalroq Donald Tramp Ukraina Oq uyning soʻrovlariga qaramay, Rossiyadagi neftni qayta ishlash zavodlariga zarba berishda davom etayotganini tanqid qilgan va mamlakatda yangi prezidentlik saylovlari oʻtkazishga chaqirgan edi.
Oktabrda Tramp Moskva bilan Rossiya yonilgʻisiga nisbatan sanksiya cheklovlarini vaqtincha yumshatuvchi «dizel kelishuvi»ni ham eʼlon qilgan.
AQSH prezidenti Rossiya va Ukraina oʻrtasida «energetik sulh» haqida gapirgan boʻlsa-da, DW maʼlumotiga koʻra, Moskva ham, Kiyev ham bunday kelishuv tuzilganini tasdiqlamagan. Rossiya qoʻshinlari esa Ukraina energetika obyektlariga ballistik raketalar bilan zarbalar berishda davom etgan.
