Samarqandda 18–22-oktabr kunlari shaharga kirish yoʻllari va 16 ta markaziy koʻchada transport harakati vaqti-vaqti bilan cheklanadi. Bunga shaharda oʻtkaziladigan yirik xalqaro tadbirlar sabab boʻlmoqda.
Ichki ishlar vazirligiga koʻra, shahar 19−20-oktabr kunlari «S5+1» formatidagi Markaziy Osiyo mamlakatlari va AQSH tashqi ishlar vazirlari uchrashuviga, 21−22-oktabr kunlari esa bolalar farovonligi va kelajagiga bagʻishlangan butunjahon sammitiga mezbonlik qiladi.
Harakat cheklanadigan koʻchalar: Ibn Sino, Boʻstonsaroy, Universitet xiyoboni, Registon, Afrosiyob, Namozgoh, Sadriddin Ayniy, Shohbot, Usta Umar Joʻraqulov, Shohi Zinda, Mirzo Ulugʻbek, Beruniy, Dahbed, Rudakiy, Gulobod va Oydin yoʻli.
Bu davrda haydovchilar uchun aylanma yoʻllar orqali harakatlanish tashkil etiladi. Yopilgan yoʻllardan faqat tezkor xizmatlarning maxsus transport vositalari harakatlanishiga ruxsat beriladi.
Samarqand viloyati hududidan tranzit oʻtuvchi transport vositalari uchun ham aylanma harakat yoʻnalishlari belgilangan.
Vazirlik haydovchilar va shahar mehmonlaridan vaqtinchalik noqulayliklarni toʻgʻri tushungan holda, yoʻllarda xavfsizlikni taʼminlayotgan masʼul xodimlarning talablariga rioya qilishni soʻragan.
