Kinoaktyorlar va talabalar uchrashuvida milliy kino yoshlarni “ommaviy madaniyat”ning salbiy ta'siridan asrayotgani ta'kidlandi

Mirzo Ulug‘bek nomidagi O‘zbekiston Milliy universitetida kinoaktyorlar bilan uchrashuvlar va boshqa ma'naviy-ma'rifiy tadbirlar talabalarda katta qiziqish uyg‘otmoqda. Yaqinda “Faxrim, ziyo maskanim – Milliy universitet” shiori ostida o‘tkazilgan talaba-yoshlar festivali doirasida bir guruh taniqli kinoaktrisalar bilan davra suhbati bo‘lib o‘tdi. 

O‘zMU prorektori Davlatboy Jumaboyev, Murabbiylar kengashi raisi Abror Xidirov va boshqalar tomonidan yurt mustaqilligi yillarida yaratilgan qator filmlar yoshlar dunyoqarashini munosib shakllantirishga xizmat qilayotganini, ularni “ommaviy madaniyat”ning salbiy ta'siridan asrashda milliy kino san'atining g‘oyat muhim o‘rin tutishi alohida ta'kidlandi. 

Ko‘psonli muxlislari qalbidan joy olayotgan kinoaktrisalar Gulxumor Abdullayeva, So‘g‘diyona Azimova va Sitora Olimjonova yangi-yangi filmlar yaratish yo‘lida amalga oshirayotgan ishlari, bu borada erishilgan yutuqlari va yechimini kutayotgan muammolar haqida so‘zlab berdi. 

Davra suhbatida talabalar o‘zlarini qiziqtirgan savollariga javoblar olishdi.