Tirbandliklarni onlayn kuzatish va yo‘llardagi chuqurlar xaritasi. «Raqamli Toshkent» loyihasi amalga oshiriladi

Bugun, 4 mart kuni, Toshkent shahar hokimligi va BMT Taraqqiyot dasturining raqamli rivojlanish sohasidagi hamkorlik hamda innovatsiyalarni joriy etishga bag‘ishlangan matbuot anjumani bo‘lib o‘tdi. Tadbir OAV va Toshkent shahar hokimligi huzuridagi Jamoatchilik kengashi uchun taqdimot shaklida o‘tkazildi.

Poytaxt ma'muriyatining BMT Taraqqiyot dasturi bilan raqamli rivojlanish sohasidagi hamkorligi 2019 yil iyun oyidan, BMT Taraqqiyot Dasturining “Samarali davlat boshqaruvi va raqamli transformatsiyaning rivojlanishiga ko‘maklashish” dasturi doirasida amalga oshiriladi. Hamkorlik hokimlik xizmatlari va ma'muriy jarayonlarining raqamli transformatsiyasiga, shuningdek shahar boshqaruviga innovatsiyalarni joriy etishga yo‘naltirilgan. 2019 yilda ishlab chiqilgan “Raqamli Toshkent” loyihasi raqamli va innovatsion texnologiyalar yordamida shahar boshqaruvi samaradorligini oshirishni hamda shahar aholisi va mehmonlari hayotining sifatini yaxshilashni maqsad qilib qo‘ygan. Vazifa Buyuk Britaniyaning O‘zbekistondagi elchixonasi moliyaviy ko‘magida amalga oshiriladi.

Hozirgi vaqtda tizim transport, bojxona va ijtimoiy-iqtisodiy ma'lumotlarni tahlil qilish va vizualizatsiyasi uchun qo‘llaniladi, bu, o‘z navbatida, mavjud bo‘lgan resurslardan oqilona foydalanish va hokimlik hamda unga qarashli xizmatlar ishining samaradorligini oshirishga yordam beradi.  

Loyiha amalga oshishi doirasida poytaxtdagi tirbandliklarni real vaqt rejimida kuzatish, yo‘llardagi chuqurlar xaritasini tuzish, qaysi hududlarda taksiga ehtiyoj yuqori ekanligini aniqlash kabi qator qulayliklardan foydalanish mumkin bo‘ladi.