Трамп: Исроил билан Фаластин тинчлик борасидаги келишувга эришишга қодир

АҚШ президенти Дональд Трамп Исроил ва Фаластин ўн йиллар мобайнида давом этиб келаётган қон тўкилишини тўхтатишга имкон берувчи келишувга эришишга қодир, деб ҳисоблайди. 

"Тинчликка эришиш осон бўлмайди, икки томон ҳам қийин қарорларни қабул қилишига тўғри келади. Бироқ исроилликлар ва фаластинликлар келишувга эришишга қодир", - деди Трамп Қудсдаги Исроил музейида икки мамлакатга ташрифи якунлари бўйича нутқ сўзлар экан. 

"Нетаньяху тинчлик тарафдори", - деди Трамп. Унинг сўзларига кўра, фаластинликлар ҳам "тичнлик сари қадам ташлаш"га тайёрлар.

Бундан ташқари, Трамп доим Исроил томонда бўлишга ваъда берди ва икки мамлакат иттифоқи бузилмас эканини тасдиқлади. 

Дональд Трамп душанба куни Саудия Арабистонидан Исроилга келди. У Қудсда Исроил президенти ва бош вазири Реувен Ривлин ҳамда Биньямин Нетаньяху билан музокаралар ўтказди. Бугун эрталаб у Иордан дарёси Ғарбий қирғоғидаги Байтлаҳмга борди - у ерда Фаластин етакчиси Маҳмуд Аббос билан учрашиб, Қудсга қайтди. 

Бугун, 23 май куни Трамп Исроилдан Ватиканга парвоз қилади.