Фото: RT
Қирғизистон пойтахти Бишкек шаҳрида январь ойи бошидан буён кузатилаётган совуқ ҳарорат туфайли 15 киши ҳалок бўлган. Бу ҳақда шаҳар ички ишлар бош бошқармаси хабар берган.
«Дастлабки суд-тиббий экспертиза маълумотларига кўра 1 январдан 25 январгача бўлган даврда доимий турар жойи бўлмаган 15 киши совуқдан ҳалок бўлган», — дейилган хабарда.
Қирғизистон ФВВ ҳаво кескин совишидан огоҳлантирган. Вазирлик маълумотига кўра, 26—29 январь кунларида баъзи ҳудудларда тунда ҳаво ҳарорати -40...-45 даражагача тушиши, кундузи -28...-33 даражани ташкил этиши айтилган.
Бундан аввалроқ Қирғизистон мактабларида совуқ сабабли таътил эълон қилингани ҳақида хабар берилганди.
