Бишкекда Путин ташрифи олдидан Украина элчихонаси улкан LED-экран ортига “бекитилди”

Бишкекдаги Украина элчихонаси биноси билан унга қарама-қарши томонда жойлашган Қирғизистон президенти қароргоҳи орасига улкан LED-экран ўрнатилди. Бу, Россия президенти Владимир Путиннинг шаҳарга келиши арафасида, 27 ноябр, пайшанба куни бўлиб ўтган Коллектив хавфсизлик тўғрисидаги шартнома ташкилоти (КХШТ) саммити олдидан амалга оширилди.

Конструкция ўрнатилгани ҳақида 20 ноябр куни журналист Григорий Пирлик ўзининг Telegram-каналида ёзган эди. У эълон қилган фотосуратларга қараганда, бир неча қаватли уй баландлигига тенг иншоот шундай қилиб қўйилганки, яқинда очилган президент ва ҳукумат қароргоҳи “Интимақ Ордо” ҳудудидан экрандаги тасвирни кўришга девор халал беради. Лекин айни пайтда бу конструкция Россия тажовузидан азият чеккан мамлакат — Украина элчихонаси ҳудудидаги байроқни кўринишдан яширади.

Қирғизистон президенти матбуот хизматига кўра, кўча ўртасида ўрнатилган улкан LED-экран “ҳукумат видеоматериалларини намойиш қилиш ва протокол тадбирларига визуал ҳамроҳлик қилиш учун” мўлжалланган. Бир қатор ОАВ Украина элчихонасини беркитиб қўядиган бундай конструкция ўрнатилишини Путиннинг Бишкекка келиши билан боғлади — ташриф доирасида у “Интимақ Ордо”га ҳам борган. Қирғизистондаги Украина элчиси маслаҳатчиси Денис Автономов эса бу ҳақда “сабаб–оқибат боғланиши, шубҳасиз, мавжуд” деган қисқа изоҳ билан чекланди.

Сиёсий шарҳчи Турат Акимов содир бўлаётган воқеани Путин хавфсизлигини таъминлаш билан шуғулланадиган ФСО (Россия Федерал хавфсизлик хизматининг президентни қўриқлаш қилиш хизмати) фаолияти билан боғлади. Унинг айтишича, Россия махсус хизмати ходимлари “одатда ўн кунча олдин келиб, бутун ҳудудни ўрганиб чиқади”. Улар Украина элчихонаси ҳудудидан Путин учун таҳдид келиб чиқиши мумкин, деб ҳисоблаган бўлиши ва Қирғизистон томони ушбу “хавф”ни бартараф этиши керак, деб ўйлашган бўлиши мумкин, деб тахмин қилади Акимов.

Владимир Путин Бишкекка 26 ноябр куни келди, эртаси куни эса “Интимақ Ордо”да бўлиб ўтган КХШТ саммитида иштирок этди. Тадбир якунлари бўйича Кремл раҳбари ҳукумат мажмуасида ўтказилган матбуот анжуманида ОАВ журналистлари олдида нутқ сўзлади. Берилган саволларнинг асосий қисми Россиянинг Украинага қарши урушига оид эди.

Путин билдирган баёнотлар орасида — декабр бошида Москвага Украина бўйича Доналд Трампнинг тинчлик режасини муҳокама қилиш учун АҚШ делегацияси келиши тасдиқланди. Кремл раҳбари Москва Украина ҳақидаги “келгуси келишувлар асоси сифатида” АҚШ президенти маъқуллаган урушни тўхтатиш режасини қабул қилишга тайёрлигини айтди, аммо “ҳозирча ҳеч қандай якуний вариантлар йўқ экани учун улар ҳақида гапириш ўринсиз”лигини қўшимча қилди.

Шу билан бирга, Путин Россия Украина шарқида Москва талаб қилаётган ҳудудлар берилмагунча у ерда ҳарбий ҳаракатларни давом эттиришини яна бир бор таҳдид оҳангида таъкидлади: “Украина қўшинлари эгаллаб турган ҳудудлардан чиқиб кетсин — ана ўшанда ҳарбий ҳаракатлар тўхтайди. Чиқмаса — биз буни қуролли йўл билан амалга оширишга эришамиз”, — деди у.

Украина президенти девони раҳбари Андрей Ермак 27 ноябр куни The Atlantic нашрида чоп этилган интервюсида Киев Россияга ҳудудий имтиёзлар бериш масаласини кўриб чиқмаётганини билдирди. “Конституция бунга йўл қўймайди. Украина конституцияси ва Украина халқининг иродасига қарши чиқмоқчи бўлмаган бирон киши бундай қарор қабул қила олмайди”, — деди Ермак.

Унинг таъкидлашича, Володимир Зеленский Украина президенти бўлиб турган экан, Киев Россия фойдасига оккупация қилинган ҳудудларни тан олишига “ҳеч ким умид қилиши керак эмас”.

Ермакнинг сўзларига кўра, ҳозир Украина уруш қилаётган томонлар назоратидаги ҳудудларни ажратиб турадиган чизиқ қаердан ўтиши кераклиги ҳақидаги масалани муҳокама қилишга тайёр. “Ҳозир биз реал гаплаша оладиган ягона нарса — тўқнашув чизиғини белгилаш. Қилиш лозим бўлган ишимиз шу”, — дея у яна бир бор қайд этди.