TİKA'нинг Ўзбекистонга кўрсатадиган ёрдами 2-3 бараварга ошади

Туркиянинг TİKA агентлиги бугунга қадар Ўзбекистонда йилига 30-40 лойиҳани амалга оширган бўлса, эндиликда икки мамлакат ўртасидаги муносабатларнинг янги сифат босқичига кўтарилгани боис бу кўрсаткич икки-уч бараварга оширилади. Туркия Республикасининг Ўзбекистондаги фавқулодда ва мухтор элчиси Аҳмад Башар Шен KUN.UZ мухбирига ҳақида хабар берди.

"Ўзбекистондаги мактабгача таълим муассасалари реновацияси билан боғлиқ лойиҳаларимиз бор. Шунингдек, тиббиёт ва хавфсизлик соҳасида қатор лойиҳаларни амалга ошириб келяпмиз. Бу ерда янги туғилган чақалоқлар учун кувезлар (Муддатидан илгари туғилган чақалоқлар жойлаштирилувчи автоматик равишда кислород етказилувчи ва оптимал ҳарорат сақланиб турувчи шиша мослама)га эҳтиёж бор эди, Туркиядан Ўзбекистонга 100 га яқин кувезлар келтирилди. Бундан ташқари, баъзи клиникаларда жарроҳлик операциялари хоналарини жиҳозлаш билан боғлиқ муаммолар мавжуд. Масалан, Термиз шаҳридаги шифохонада шундай вазият аниқлангач, у ерга МРТ, сканер каби тиббий ускуналар етказиб берилди", - дейди элчи.

Унинг сўзларига кўра, Термизда ўтган Туркия соғлиқни сақлаш ҳафталигида 150 нафар бемор операция қилинган, 700 нафарига эса ташхис қўйилган.

"Яна бир лойиҳамизга кўра, Ўзбекистон ҳуқуқни муҳофаза қилиш ходимлари терроризмга қарши кураш бўйича Туркияга йўлланмоқда", - дейди у.

Башар Шеннинг таъкидлашича, туркий халқлар мустақилликка эришганидан кейин Туркия ҳамкорлик ва тараққиёт агентлиги (ТҲТА) керакли йўналишлар бўйича уларга кўмак бера бошлаган.

"Агентлик ташкил қилинган вақтдан бошлаб то 2017 йилга қадар TİKA'нинг Ўзбекистонга кўрсатган ёрдами 26 миллион долларни ташкил қилади. Сўнгги вақтларда мамлакатларимиз ўртасидаги ўзаро муносабатлар жонланганидан кейин бу рақамлар икки-уч бараварга ошади", - дея маълум қилади элчи.

Маълумот учун: Туркия ҳамкорлик ва тараққиёт агентлиги (Turkish Cooperation and Coordination Agency - TİKA) - Туркиянинг ривожланаётган мамлакатларнинг тараққиёт соҳасидаги расмий ёрдамининг асосий қисмини ташкиллаштириш учун жавоб беради, бунда айниқса туркий мамлакатлар ва жамиятларга алоҳида эътибор қаратилади.