Жангда бўйнидан ўқ еган Тўланбой ота. У 99-баҳорини қаршилади

Урушдан қайтган Тўланбой ота «Катюша» қўшиғини айтиб, рақсга тушарди. Шу сабаб олтиариқликлар уни Катюша тоға дейишади.

1945 йилда Ватанга қайтган Тўланбой ота оила қурди. 1950 йилдан ички ишлар соҳасида, ёнғинга қарши кураш отрядларида хизмат қилди.

Фашизм устидан қозонилган ғалабанинг 50 йиллиги, 60 йиллиги, 65 йиллиги, 70 йиллиги медаллари, 1994 йилда эса биринчи президент Ислом Каримов томонидан «Жасорат» медали билан мукофотланган.

«99 ёшга кирдим. Урушга бориб, кўп юртларни кўриб келганман. Хитой, Япония, Владивосток, Амурский вилоятларида 6 йил юриб келдим.

1941 йил 17 январда уйдан чиқиб кетганман. Фронтга кетаётиб: «Мендан умидингизни узинг, урушдан қайтиб келишим даргумон» деганимда, ота-онам: «Полвон ўғлим, сен албатта қайтиб келасан», дейишган эди. Отамнинг бу айтган гапи ҳалигача эсимда», – дея хотирлайди Тўланбой ота Шокиров.

Уруш фахрийси жанглардан бирида бўйин қисмидан ярадор бўлади. Шунга қарамай, даволаниб, соғайгач, яна сафга қайтади ва фашистларга қарши курашда фаол иштирок этади.

99 ёшли уруш фахрийси Тўланбой ота ҳозирда фарзандлари, невара-ю чеваралари қаршисида кексалик гаштини суриб келмоқда.

Сарвар Зияев,
Kun.uz мухбири