Азим Аҳмадхўжаев Энергетика вазири биринчи ўринбосари этиб тайинланди

Азим Исроилович Аҳмадхўжаев президентнинг 31 августдаги қарори билан Энергетика вазири биринчи ўринбосари лавозимига тайинланди. Бу ҳақдаги маълумотни Kun.uz манбаси тасдиқлади.

Азим Аҳмадхўжаев 2019 йилдан буён Жиззах вилояти ҳокимининг ўринбосари – инвестициялар ва ташқи савдо бошқармаси бошлиғи лавозимида ишлаб келаётганди.

Азим Аҳмадхўжаев 1979 йилда туғилган, 2002 йилда Тошкент давлат иқтисодиёт университетини тамомлаган. 2011 йилдан Миллий банк бошқаруви раиси ўринбосари, раиснинг биринчи ўринбосари лавозимларида ишлаган, 2016 йил май ойидан 2017 йил мартигача «Асака» банкини бошқарган.

2017−2018 йилларда Инвестициялар бўйича давлат қўмитаси раиси лавозимида ишлаган. 2018 йил февралидан августигача Ўзбекистон ахборот технологиялари ва коммуникацияларини ривожлантириш вазири бўлган. Жиззах вилояти ҳокимига ўринбосар бўлиб кетишидан олдин Президент ҳузуридаги Лойиҳа бошқаруви миллий агентлиги рақамли иқтисодиёт ва блокчейнни ривожлантиришга масъул лавозимда ишлаган.

Бундан олдинроқ Энергетика вазири ўринбосари Беҳзод Норматов «Ўзтрансгаз» АЖ бошқарув раиси лавозимига тайинланганди.