Ҳукумат бу йил ҳам бюджет лойиҳасини парламентга вақтида киритмади

Бюджет кодексининг 97-моддасига асосан, Давлат бюджети тўғрисидаги қонун лойиҳаси ва бюджетнома Вазирлар Маҳкамаси томонидан Олий Мажлис палаталарига, қоида тариқасида, жорий йилнинг 15 октябридан кечиктирмай киритилиши белгиланган.

Лекин, парламент депутати Дониёр Ғаниев ўз Telegram-каналида ёзишича, 2021 йил 9 ноябр ҳолатига, яъни белгиланган муддатдан 25 кун ўтган бўлса-да, бюджет лойиҳаси ва бюджетнома Қонунчилик палатасига киритилгани йўқ.

“Шунингдек, Бюджет кодексига ўтган йили киритилган ўзгартиришларга асосан, келгуси йил учун янгиланган ўрта муддатли давр фискал стратегияси Вазирлар Маҳкамаси томонидан жорий йилнинг 15 июнига қадар тасдиқланиши ва тасдиқланган фискал стратегия маълумот учун Олий Мажлис палаталарига тақдим этилиши ҳамда жамоатчилик учун Молия вазирлиги веб-сайтида эълон қилиниши белгиланган.

Белгиланган муддатдан деярли 5 ой ўтган бўлса-да, ўрта муддатли фискал стратегия на Олий Мажлис палаталарига киритилган, на Молия вазирлиги веб-сайтида эълон қилинган. Ўзи умуман 2022 йил учун янгиланган фискал стратегия Молия вазирлиги томонидан ишлаб чиқилганми ёки йўқ, бу ҳам номаълум.

Тўғри, бу йил мамлакат президентлигига сайлов ўтказилгани ва ғолиб номзод томонидан сайловолди дастурда илгари сурилган масала ва режалар янги бюджет лойиҳасида ўз аксини топиши нуқтайи назаридан 2022 йил учун бюджет лойиҳасини ишлаб чиқиш кечикиши табиий ҳол.

Лекин шунга қарамай, бюджет лойиҳасининг Олий Мажлис палаталари томонидан кўриб чиқилиши учун ҳам етарлича вақт берилиши керак. Гарчи амалда депутатлар бюджет лойиҳаси параметрларига жиддий ўзгартириш ёки қўшимча киритолмасалар-да, лекин бюджет муҳокамаси учун Бюджет кодексида белгилангандек, қоида тариқасида, Қонунчилик палатасига ҳам камида бир ой муддат қолдирилиши керак.

Умид қиламанки, бюджетномани киритишда кечикилган вақт уни Олий Мажлис палаталарида кўриб чиқиладиган муддатни қисқартириш ҳисобига қопланмайди”, дея ёзди депутат Дониёр Ғаниев.